9 noyäberdä Xalıqara sıyfat köne bilgeläp ütelä. Tatarstanda da älege könne iğtibarsız qaldırmadılar. Bötendönya sıyfatqa bağışlanğan ber könne bilgeläp ütsä, bezdä şuşı uñaydan ber atna törle çaralar oyıştırılaçaq. Sıyfat öçen ber kön genä tügel, ozağraq qayğırtırğa buldılar respublikada. Sıyfat atnası qısalarında pänceşämbe könne Qazanda tügäräk östäl utırışı uzdı. Anda satu oyışmaları, ikmäk peşerü şirkätläre qatnaştı. Söyläşüdä süz ipi peşerü, anıñ sıyfatı, qullanuçılar xoquqları turında bardı. TOdän soñ anda qatnaşuçılarnı bezdä citeşterelä torğan ikmäk, kümäç häm başqa şunıñ işe peşkän azıq belän sıyladılar. Tämläp qarawçılar, alarnıñ sıyfatı bik äybät buluın äyttelär. Älbättä, ipi, kümäçne, alar nindi genä sıyfatta bulmasın, barıber alırğa turı kilä. Çit ildän qaytarmıylar ikmäkne. Ä menä başqa tawarlarnı isä saylap alıp bula. Teläsäñ üzebezdä yasalğanın, telämäsäñ – çit ildä citeşterelgänen. Bezneñ xalıq alarnıñ qaysın saylıy soñ, qaysı ilneñ sıyfatı östenlek birä. Bügenge Açıq mikrofon säxifäseneñ çirattağı soraştıruı şuşı sorawlarğa cawap ezlär.
- Oşağan tovarlarğa östenlekne biräm, çönki xäzer çit ildän kilgän tovarlarnıñ sıyfatı xäzer bik yaxşı tügel. Elek bezneñ ildä dä bik sıyfatlı häm zäwıqlı tovarlar citeşterä ide. Ä xäzer aşıq-poşıq qına yasıylar da anda nindi sıyfat bulsın inde. Elek min çit illärgä barıp, bik matur külmäklär alıp qayta idem. Anda zäwıqlı kiemnär, ä monda bazarlardağı kiemne qara inde.
- Üzebezneñ tovarlarğa kübräk satıp alabız. Arzanlını alırğa tırışabız.
- Şäxsän üzem, üzebezdä citeşterelgän tovarlarğa kübräk iğtibar biräm. Çönki ışanıçlı dip sanıym.
- İñ elek min tovarnıñ sıyfatı iğtibar itäm. Mäsälän, bizänü, şampun', sabın işe äyberlär alğanda min kübräk çit ilneken alırğa tırışam, ä menä azıq-tölek satıp alğanda älbättä min üzebezneken satıp alam. Menä ozaqlamıy min maşina alırğa cıyınıp yörim. Häm min çit il maşinasın alaçaqmın. Alar küpkä sıyfatlıraq.
- Törleçä bula. Äytik, qayber äyberlär çit ilneke, Germaniä, İtaliä kiem-salımnarı sıfatlı, ayaq-kiemnärenä kilgändä Finlyandiä. Älbättä, üzebezdä dä sıyfatlı tovarlar bar, läkin alar bik az.
- Mina barıber, iñ möhime uñaylı bulsın.
- Çit il tovarlarına, älbättä çit ildä citeşterelgän disäk tä, alarnıñ kübeseneñ Mäskäw artında citeşterelüe bezgä bilgele. Ämma menä elekke steriotip buyınça çit il tovarları yaxşı dip sanala. Ägär inde yaqınnanraq qarasaq, bügen Qıtayda citeşterelgän tovarlar Rusiädä citeşterelgänneñ tırnağına da tormıy.
Gölnaz Şäyxetdin
