Rusiä Federatsiäse Cämäğät pulatınıñ kommunikatsiälär, mäğlümat texnologiäläre häm süz irege komissiäseneñ berençe küçmä utırışınıñ Qazanda uzuı Tatarstan öçen zur däräcä dip bilgeläp uzıldı. Anıñ jurnalistlar xoquqı temasına bäyle buluı isä Tatarstanda bu ölkädä şartlar yaxşımı yäisä kiresençä kierenkeme ikäne äytelmäde. Cämäğät pulatı äğzası, Mäskäüdä tanılğan televidenie tapşıruların alıp baruçı Nikolay Svanidze isä problemalar böten töbäklärdä bar, ämma qayda da ul äzräk, qaydadır kübräk dide. Nikolay Svanidze
Tikşerenülär kürsätkänçä, Başqortstanda, Mari İle häm Sarıtawda problemalar şaqtıy.
Nikolay Svanidze Rusiädä jurnalistika ölkäsendä ike mäs'älä barlığın äytte – anıñ berse jurnalistlarnı üterü häm bu cinayät eşläre açıqlanmaw – Vladimir List'yev, Anna Politkovskaya kebek jurnalistlar misal bulıp tora, ikençe mäs'älä isä barlıq massaküläm mäğlümat çaraların däwlät qanatı astına tığarğa tırışu. Utırışta Svanidze, bügen Ruisya xakimiäte wäkilläre irekle, yäğni üz süzen qurıqmıyça citkerä torğan massaküläm mäğlümat çaraların yaratmıylar dip assızıqladı. Tatarstan parlamentı citäkçese Färit Möxämmätşin
Tatarstan Prezidentı bezneñ respublikada berqayçan da “sarı, zäñgär” häm tağın ällä nindi gazetalar buluğa qaramastan da yapmayaçaqbız dide.
Ğomumän utırışta töbäk massaküläm mäğlümat çaraları turıda şaqtıy äytelde. Bügen küp kenä xalıq Mäskäw gazetalarına qarağanda üz cirlegendäge rayondağı mäğlümat belän kübräk qızıqsına häm şul säbäple üzlärendäge basmalarnı aldırırğa tırışa dielde. Ämma anda ber genä törle mäğlümat birelüe xaq. Çönki andağı jurnalistlar cirle xakimiät basımı astında eşlärgä mäcbür, çönki eşne saylaw mömkinlege yuq. Şul uq waqıtta Färit Möxämmätşin qayber jurnalistlar xalıqqa oşarğa tırışırğa teläp arttırıp-küpertep döres tügel mäğlümat birälär dide. Bu isä jurnalistnıñ abruyın ğına töşerä dip assızıqlandı.
Cämäğät pulatınıñ komissiä räise Pavel Gusev Rusiädä jurnalistlarnıñ abruyı yuğarımı yäki tübänme digän soraw quydı. Bilgele ki, soñğı yıllarda satılğan jurnalistlar päyda buluı säbäple xalıq mäğlümatqa şiklänebräk qarıy başladı. Şul säbäpleme bötendönya külämendä dä bezneñ däräcä tübänlege äytelde.
Utırış Tatarstanda uzu säbäpleme, jurnalist xoquqları kübräk milli häm dinara wäzğıättän çığıp sürätläne. Rusiäneñ İdel buyı Federal' okrugıyndagı wäkileneñ urınbasarı Vladimir Zorin qaywaqıt İnternetta çığa torğan mäğlümat törle xalıqlar arasında nizağlar kiterep çığarırğa mömkin dip belderde. Şulay uq utırışta jurnalistlarnıñ üz xoquqların belmäwläre äytelde. Massaküläm mäğlümat çaraları turındağı qanunnıñ da qamil bulmawına basım yasaldı. Şuña kiläçäktä jurnalistlar Xartiäsen qabul itü küzdä totıla. Sişämbe könne utırış däwam itäçäk.
Landış Xarrasova
