Düşämbe kiçen "Qazan" milli mädäni üzägendä bez “Qazan ayularğa kildek!" dip isemlängän yäşlär oçraşuı uzdı. Älege cıyın Bötendönya tatar kongressı Başqarma komitetı, "Üzebez" yaña buın xäräkäte häm Bötendönya tatar yäşläre forumı byurosı berlektä uzdırıldı. Bügenge köndä Bötendönya tatar kongressı yullaması belän, Tatarstan uqu yortlarında törle töbäklärdän kilgän 300 gä yaqın tatar studentı belem ala. Alar arasında Rusiä töbäklärennän tış, BDB illärennän dä, Qıtaydan da kilep uquçılar bar. Menä älege tatar yäşlären bergä cıyu maqsatınnan oyıştırıldı da bu oçraşu. Monda Qıtay, Latviä, Mari ile, İvanova, Ul'yan häm Başqortstannan kilep belep aluçı tatar yäşläre genä tügel, ä şulay uq tatar kongressı citäkçese Rinat Zakirov, yazuçı Rabit Batulla, jurnalist İskändär Siraci, cämäğät eşlekleläre dä qatnaştı. Bu çara ike säğät däwam itte. Törle citäkçelärneñ çığışları cır, iyüllär belän ürelep bardı. Qayber yäşlär üzläre kebek ük millättäşläre belän tanışıp, alarnı närsälär borçıluı xaqında beläse kilsä dä, bu mömkin bulmadı. Çönki birelgän waqıt uzıp, qunaqlarnı çäy mäclese häm soñınnan diskätük kötä ide.
Älege oçraşudan soñ Azatlıq radiosı yäşlärneñ tä'sirlären soraştı. Äytik, Çallıdan kilep Qazan däwlät universitetınıñ berençe kursında belem aluçı Elvira Şäkürova oçraşunı bıyıl cäy uzğan ikençe bötendönya tatar yäşläre forumı belän çağıştırdı.
“Uzğan cäydä forum 5 kön däwam itte häm ul tantanalı räweştä uzğan ide. Küp kenä töbäklär 600 läp delegat kilgän ide. Anda uquçı yäşlär genä tügel, ä olıraq yäştäge keşelär dä, törle oyışma citäkçeläre dä bar ide. Älege çaradan min bik tä'sirlänep qayttım. Uzğan oçraşu da naçar uzdı dip äytä almıym. Bu bit inde konferensiä räweşendä ütmäde, ä yäşlärne cıyıp konsert, küñel açu çarası kebek uzdı. Monda Qazanğa çit töbäklärdän uqırğa kilgän studentlar ğına cıyını bulğaç, älbättä monda keşe dä azraq ide. Uzğan oçraşuda forumda bulğan qızlarnı häm yegetlärne kürergä turı kilde. Alarnıñ kübese uqırğa kergän. Şundıy oçraşular kübräk bulsın ide. Çönki mondıy cıyınnar tatar yäşlären berläşterüçe çara bulıp tora. ”
Ä menä Başqortstan yegete, Qazan konservatoriäse studentı Alik Mäxmutov isä, oçraşuda kütärelgän küp kenä mäs'älär xaqında yäşlär añlamadılar da dip belderde.
“Cıyılışta törle mäs'älär kütärelde. Äytik, tatar domenı xaqında. Yäşlärgä oşadı disäm, oşadı. Çönki alar berençe tapqır kilgännär şundıy cıyılışlarğa. Läkin alar älege cıyılışnıñ töp mäsäläsen añlamadılar häm küp kenä problemalar açılmıy qaldı dip uylıym. ”
Şunı äytergä kiräk, älege cıyın çit töbäklärdän kilgän tatar yäşläre öçen oyıştırılsa da, cıyılğannar arasında bik küp Tatarstan yäşläre dä bar ide. Oyıştıruçılar monı çittän kilgän tatar studentları Tatarstan yäşläre belän bergä ber Qazanda qaynawı bik faydalı dip sanıy. Häm kiläçäktä yäşlär üzläre üz tormışların häm yalların oyıştırırğa öyränerlär dip ömetlänälär.
Gölnaz Şäyxetdin
