Küptän tügel genä Yedinaya Rossiä – Berdäm Rusiä firqäse üzeneñ çirattağı qorıltayın ütkärüe turında söylägän idek xörmätle tıñlawçılar. Anda Tatarstannan da sallı ğına wäkilçelek qatnaşqan ide.
Sişämbe kiçen Qazan milli – mädäni üzägendä Berdäm Rusiäneñ cirle bülege uzdırğan kiñäşmägä firqäneñ cirle häm töbäk şura äğzaları, respublika däwlät şurasınıñ Berdäm Rusiä fraksiä häm aktiv äğzaları - barlığı yözdän artıq keşe cıyıldı.
Kiñäşmädä Qazan Berdäm rusiäçelär, 2 dekaberdä Yekaterinburda uzğan firqäneñ qorıltay näticäläre turında fiker alıştı. İñ elek qorıltay eşendä qatnaşqan respublika wäkilläre firqä äğzaları belän qorıltayda kütärelgän mäs'älär, anıñ näticäläre, uzğan çaradan alğan tä'sirläre belän urtaqlaştılar. Kiñäşmäneñ barışı turında tulıraq Azatlıq radiosına Vaxitov rayonınıñ Berdäm Rusiä firqäseneñ citäkçese, Qazan şähär duması deputatı Färit Minhacev söyläde.
“Qorıltayğa barğan wäkillär üzläreneñ fikerlären bezgä citkerdelär. Yäşlär belän şöğellänüçe wäkil qorıltayda yäşlärgä qağılışlı nindi mäs'älär kütärelüe turında. Äytik, kiläçäktä här 5 nçe keşe saylanırğa tieş Berdäm Rusiäneñ federal' deputat bulıp. Şulay uq yäşlärgä kadr bulıp üsärgä kübräk mömkinçeleklär buldırılaçaq, alarğa qarata iğtibar artaçaq. Şulay uq ayırım söyläde, bezneñ wäkil firqäneñ säyäsi xälläre turında söyläde. Şulay itep, delegatlar törle yaqlap Berdäm Rusiäneñ 7 nçe qorıltayı çığarğan qaralarnı fiker alışıp söyläştek. Xäzer inde menä qorıltay çığarğan qararlar bezneñ cirle oyışmalarda tikşerelep, üzebezneñ bulğan täqdimnärebezne bez cibäräçäkbez mäskäw üzäk orğannarına Berdäm Rusiäneñ. Häm annarı sentäber aylarında 8 nçe qorıltayda firqäneñ soñğı tögäl programma çığarılaçaq.Häm şul programma belän Berdäm Rusiä firqäse 2007 yılda bulaçaq federal' saylawlarğa baraçaq. Şulay uq kiñäşmädä oyıştıru mäsäläre qaraldı. Anda firqäneñ yäşlär eşläre belän eşläwçe keşe alışındı. Xäzer bu wazıyfanı Fättäxov Damir başqaraçaq. Ul elek KVN xäräkätendä qatnaşqan bik däräcäle yäşlär liderı. Häm bezneñçä, kiläçäktä kadr üzgäreşe arqasında yäşlärgä qarata iğtibar artaçaq.
Şulay uq, Färit Minhäcev süzlärenä qarağanda, qorıltayda yañğırağan çığışlar şaqtıy sallı, alarda il öçen iñ möhim problemalar kütärelgän häm alarnı çişü yulların täqdim itelgän. Uzğan Berdäm Rusiä qorıltayınıñ ähämiäte, şunda dide Färit Minhäcev, monda programmanıñ töp nigezläre tikşerelde häm qabul itelgän. Şulay uq firqäneñ östenlek birelä torğan yünäleşlär turında fiker alışqanda firqäneñ törle däräcädäge äğzaları qatnaşqan. Şunı äytergä kiräk, Berdäm Rusiä turında söylägändä Sovet zamannarındağı kebek KPSSnı xuplaw häm ömetlär bağlaw fikerlärennän başqa mäğlümatlar tabıp bulmıy. Bügenge köndä firqä törle yullar belän äğzaların arttıru östendä eşli. Xäzerge waqıtta Qazanda 20 meñnän artıq keşe Berdäm Rusiä saflarında häm tağın 1800 keşe ğariza birgän. Ä menä alarnıñ firqägä kerü säbäpläre häm maqsatları turında tögäl genä mäğlümatlar kiñ cämäğätçelekkä bilgele tügel.
Gölnaz Şäyxetdin
