14 dekaber Tatarstan xäbärläre çığarılışınıñ başında – çärşämbe könneñ ber möhim temasın däwam itäbez, x.t. İnde xäbär itelgänçä, 13 dekaberdä Rusiäneñ Däwlät Dumasında Tatarstan belän federal’ üzäk arasındağı şartnamä qaralırğa tieş ide. Läkin inde Mintimer Şäymiev häm Vladimir Putin tarafınnan imzalanğan älege dokumentnı tikşerü bulmadı bu könne. Kiçekterelüneñ säbäpläre turında bik açıq äytelmäsä dä, säbäplärneñ berse itep Kommunistlar firkäse wäkilläreneñ häm qayber Rusiä töbäkläreneñ şartnamägä qarşı çığuın kiterälär. Xäyer, bu äle şartnamädän baş tartu tügel, ul bälki kiläse yılnıñ 15 ğinwarında qaralır dip ömetlänälär Tatarstanda. Tatarstannıñ Däwlät Şurası deputatı Räzil Wäliev söyli.
Bu şartnamäne Vladimir Putin Däwlät Dumasına täqdim itkännän soñ, Rusiä töbäklärendä şaqtıy ğına ığı-zığılar başlandı. Min alarnı añlap ta betermim, çönki Tatarstannıñ Rusiä belän şartnamäse bulğannan berkemgä dä zıyan kilmi. Bälki kiläçäktä başqa töbäklär dä şundıy şartnamä tözegän bulırlar ide, çönki Rusiä konstitutsiäse mondıy mömkinlek birä. Bügenge köndä min ömetemne özmim. Ägär dä inde ike prezident ta şartnamäne imzalap, anı Rusiä Däwlät Dumasına täqdim itkännär ikän, dimäk ul hiçşiksez qaralırğa häm qabul itelergä tieş dip ışanam häm ömetlänäm min Tatarstan belän federal’ üzäk arasındağı wäkälätlärne büleşü turındağı şartnamäneñ kiläçäge turında respublika parlamentı deputatı Räzil Wäliev menä şundıy fikerdä tora.
Gölnaz İlgizär
