Tatarstanda bu aralarda respublika belän Rusiä arasındağı wäkälätlärne büleşü turındağı şartnamä iğtibar üzägendä. Döresräge, älege şartnamäneñ kileşelgänçä 13 dekaber könne Rusiä Däwlät Dumasında qaralmawı häm şuşı dokument xaqında yasalğan belderülär. Xäyer, belgeçlär fikerençä, älege mäs’älä Tatarstan öçen genä tügel, ä ğomumän Rusiä öçen dä bik möhim häm aktual’ dip sanıy. Mäsälän, Tatarstannıñ Rusiädäge wäkileneñ berençe urınbasarı, säyäsät fännäre doktorı Mixail Stolyarov, şartnamä mäs’äläse Rusiäneñ federativ kiläçägenä bäyle, dip sanıy. Konstitutsiä buyınça, Rusiä demokratik häm federativ il, näq menä şuña nigezlänep Tatarstan şartnamä imzalarğa täqdim itte, di ul. Läkin monıñ belän kileşmäwçelär dä az tügel bügenge Rusiädä. Menä Däwlät Duması räise Boris Grızlov Tatarstan belän Rusiä arasındağı şartnamäne tikşerü bilgesez waqıtqa kiçekterelä, dip belderde 19 dekaber könne. Bu dokument östendä eş däwam itä, deputatlarnıñ aña äle sorawları bar, dide ul. Ä Federatsiä Şurası citäkçese Sergey Mironov isä, bu şartnamä ğomumän kiräkmi, dip sanıy häm Şurağa anı raslamasqa täqdim itte.
Bu xaqta Tatarstannıñ Rusiädäge wäkileneñ berençe urınbasarı, säyäsät fännäre doktorı Mixail Stolyarov menä nindi fikerdä tora.
Mironov şartnamäne tänqitläp, ul Rusiäneñ cimerüenä kiteräçäk digändä, ul, minemçä, xaqiqätkä qarşı kilä. Säyäsätçe bularaq ul bik äybät añlıy, şartnamä kiresençä, töbäklärneñ resursların tuplarğa häm Rusiä xäl itä torğan zur häm möhim burıçlarğa ireşergä yärdäm itä. Ğalim bularaq, minem fikerem şundıy. Sergey Mironov citäklägän Spravedlivaya Rossiya – Ğädel Rusiägä üzlären xalıqqa kürsätü çaraları citep betmi. Bälki şartnamägä qarşı çığu şunıñ öçen kiräk bulğandır. Bu oçraqta Mironov Federatsiä Şurası citäkçese tügel, ä Ğädel rusiä firkäse başlığı bularaq eş itäder. Bu qaraş qızğanıç, älbättä. Mintimer Şäymiev, Färit Möxämmätşin şartnamä xaqında üz fikerlären inde şaqtıy belderde. Menä şuşı respublika xalqı telägen beldergän citäkçelekneñ dä , tatarstannıñ da fikere Däwlät Duması tarafınnan da, Federatsiä Şurası tarafınnan da işeteler, dip kenä ömetlänäse qalaSäyäsät fännäre doktorı Mixail Stolyarov, respublika citäkçelegenä şartnamä turında uñay fiker buldırırğa, anıñ Rusiä Konstitutsiäse nigezendä eşläwen añlatırğa kiräk, digän fikerdä tora.
Gölnaz İlgizär
