Respublikanıñ Cämäğät pulatı 25 dekaber könne üzeneñ çirattağı utırışına cıyıldı. Anda bu yulı uzıp baruçı yıldağı eşçänlege, kiläçäkkä eş plannarı turında bardı. Utırışqa respublika citäkçelege wäkilläre dä kilgän ide. Yıl axırında, ğädättägeçä, uzğan eşlärgä yomğaqlar yasıylar, xisap totalar. 2006 yılnıñ 27 ğinwarında üzeneñ täwge utırışına cıyılğan Cämäğät pulatı wäkilläre dä üzläreneñ eşçänleklärenä berençe näticälären yasadı. Pulat respublika prezidentı häm parlamentı tarafınnan täqdim itelgän Tatarstannıñ 2700dän artıq ictimaği oyışmasınnan wäkil itelgän 50 äğzädän tora. Alar 7 komissiägä bülenep eş alıp baralar. Cämäğät Pulatın İlgiz Xäyrullin citäkli. Ber yıldan da kimräk waqıt qına eşläwgä dä qaramastan, monda şaqtıy ğına cämğiät aldında torğan möhim mäs’älälär turında fikerläşülär oyıştırıldı. Pulatnıñ Tatmedia agentlığı, keşe xoquqları buyınça wäkil, qullanuçılar xoquqların yaqlaw oyışması, Eçke eşlär ministrlığı, Xisaplaw pulatı belän xezmättäşlek turında kileşülär tözelgän.
25 dekaber könne Qazan milli mädäni üzägendä ütkän utırışqa kilgändä, anda Cämäğät Pulatınıñ äğzälärennän tış respublika Däwlät Şurası räise Färit Möxämmätşin, Tatarstan Prezidentı apparatı wäkile Aleksandr Terent’yev, Rusiä Cämäğät pulatı wäkile Roza Tufitulova qatnaştı. Anda qaralğan mäs’älälär turında tulıraq itep Azatlıq radiosı tıñlawçıları Cämäğät Pulatı äğzäse, Bötendönya tatar kongressı räiseneñ berençe urınbasarı Rinat Wäliullin söyli.
Utırışta Pulatnıñ barlıq komissiäläre dä üzläre qabul itkän plannar nigezendä eşläwläre turında söyläde. Rusiä Cämäğät pulatı wäkile Roza Tufitulova Tatarstan Cämäğät pulatınıñ eşçänlege anda da bik yuğarı bilgelänüe turında äytte. Färit Möxämmätşin isä, Cämäğät Pulatı xakimiät belän xalıq arasında nindider aradaşçı bulırğa tieşlegen äytte. Sezneñ töp maqsatığız – cämäğätçelekne borçığan mäs’älälärne xakimiätlärgä citkerü, dide ulŞulay uq, utırışta çığış yasağan Färit Möxämmätşin Cämäğät pulatı xalıqqa iñ yaqın bulğan oyışma, sez xakimiät eşläp betermägän oçraqta xalıq fikeren alarğa citkerer tieş, dip belderde. Çınbarlıqta bu inde xäzer dä şulay ikän. Rinat Wäliullin fikerençä, Tatarstannıñ Cämäğät pulatında respublika xalqın borçığan mäs’älälär qarala. Çönki tikşeräläçäk problemalarnı keşelär üzläre täqdim itä.
Cämäğät pulatı wäkile Rinat Wäliullin süzlärenä qarağanda, utırışta kiläse yılğa plannar da tikşerelgän. 2007 yılda respublika Cämäğät pulatı üzeneñ eşçänlegen tağı da kiñäytergä cıyına.
Gölnaz İlgizär
