Tatarstanda qışqı bäyräm häm kanikullar däwam itä. Aşığıç yärdäm, yanğın sünderüçelär, ğadättäntış xällär ministrlığı, xastäxanälär, televidenie, radio redaksiäläre häm Azatlıq radiosınıñ Qazan studiäsennän başqa barlıq oyışmalar da yal itä bu aralarda. Bäyräm aldındağı, şimbä häm yäkşämbe könnäre yaña yıl ığı-zığısında ütte. Törle oyışmalar, däwlät çinovnikları, säwdägärlär yılnıñ soñğı könendä tämamlıysı eşlären xästärläp, bik qızu xäräkättä buldı. Bigräk tä yäkşämbe könne mäşäqätle buldı. 31 dekaberdä uzıp baruçı yılğa noqta quyu belän berrättän Qorban bäyräme dä bilgelände. Şuña da, bu könne Qorban çalu, fäqirlärgä xäyer taratu eşläre başqa dönya mäşäqätläre arasında kümelep tä qaldı beraz. Qorban bäyräme nisbätennän Tatarstan Prezidentı Mintimer Şäymiev respublika xalqına möräcäğät belän çıqtı. İzge Qorban bäyräme öyläregezgä şatlıq häm berdämlek alıp kilsen, ä kürkäm ğailä uçağı yöräklärne cılıtsın, kiläçäkkä ömetlärne häm ışanıçnı arttırsın, digän teläklär äytelä Mintimer Şäymiev Qorban ğäyete uñayınnan tatarstanlılarğa möräcäğätendä. Bäyräm uñayınnan Qol Şärif mäçetendä ğäyet namazı uqıldı, diniä näzaräte räise Ğosman İsxaqinıñ bäyräm wäğäze tıñlandı. Annarı telägän keşelär qorban çaldı, anı tuğan-tumaçağa, moxtac keşelärgä eläşte.
Qorban ğäyete şulay itep ğädättägeçä bäyräm itelsä dä, 31 dekaberdä uzğan yılnıñ nindi xatirälär qaldıruı häm yaña yılğa ömetlär bağlaw aldınğıraq urında tordı. Bigräk tä, telefon, fatir bäyäläreneñ üsüe iğtibar üzägendä tordı. Şähär transportına bäyälär artuı da sizelmi qalmadı. Xäzer Qazanda tramvay, trolleybus, metroda yörü 8 sumğa töşä. Döres, yaña yılnıñ berençe könnärendä alarda yörüçe äle ällä ni küp tügel, uramada maşinalar häm keşelär dä az kürenä.
Citäkçelär dä uzğanğa yomğaqlar, kiläçäkkä plannar xaqında uylana. Tatarstanda citäkçelär arasında, ğadi xalıqtan ayırmalı bularaq, soñğı waqıtta uñay küreneşlärgä iğtibar itü häm kiläçäkkä zurraq ömet belän qaraw küzgä taşlana. Mäsälän, Mintimer Şäymiev yaña yıl uñayınnan yasalğan möräcäğätendä bolay dip äytte. Uzıp baruçı yıl Tatarstan öçen, ğomumän, uñışlı, totrıqlı üseş yılı buldı. Respublikada toraq sotsial' ipoteka programması da könnän-kön kiñräk qolaç ala. Bilgele bulğança, sälämätlek saqlaw ölkäsendä däwalawnıñ iñ aldınğı ısulları tormışqa aşırıla. Awıl xucalığı, yullar tözü häm başqa elemtä çaraları buldıru ölkälärendä dä uñay üzgäreşlär sizelä, dide Tatarstan prezidentı. Häm respublika xalqına şuşılarnı buldırğan xezmätläre öçen räxmätlären belderde. Axırda Mintimer Şäymiev üzeneñ teläklären dä citkerde. İzge Qorban bäyrämennän başlanıp kitüçe Yaña yıl tormışıbızğa - mullıq, ğailälärebezgä - iminlek, barçabızğa da sälämätlek häm bäxet kitersen! Ber-berebezne qayğırtıp yäşik, ber-беребезгә iğtibarlı häm ixtiramlı bulıyq, digän teläklär citkerä tatarstanlılarğa Mintimer Şäymiev.
Gölnaz İlgizär
