Çärşämbe könne “Azatlıq” radiosınıñ Qazan bülegenä Svedlau ölkäseneñ Arta rayonınıñ Acığol awılında yäşäwçe Vilson Xafizov şaltırattı. “Azatlıq” radiosın 45 yıldan artıq qısqa dulqınnan tıñlağan Vilson äfände, menä ike yıl inde ul Azatlıqnı sputnik tälinkäse aşa tıñlıy ikän. Bik ozaq şaltıratırğa cay ezläp yörgännän soñ Vilson Xafizov üz fikerläre, borçuları belän Azatlıq radiosı belän dä büleşte:
“Awıl zur, läkin tıñlawçı yuq diärlek. Awılda min berençe keşe bulıp sputnik tälinkäsen quydırdım. Şunnan soñ kürşelär miña kerep, radio tıñlıy, “Yaña ğasır”nı qarıy başladılar. Xäzer inde awılda 20 läp keşe şul sputnik tälinkäsen quydırdı. Şul urısqa tabınıp qarap utıralar inde. Menä ike yıl buldı inde, elek min “Azatlıq” radiosın da qısqa yäki ozın dulqınnan tıñlıy idem, ä xäzer inde “Yaña ğasır” radiosı aşa tıñlıym. Annarı şunı äytäse kilä, küp waqıt “Yaña ğasır” sezne irtän quymıymı şunda, işetep bulmıy. ”
Menä şulay itep, Vilson äfändegä qarap küplär sputnik tälinkä alıp, tatar telendä Azatlıq, Yaña ğasır radio häm televiden'yeların qarıy, işetä başlağannar. Ämma Yaña ğasır tapşırularına qarata Vilson äfände üz şeltäsen belderde:
“Bu “Yaña ğasır” telekanalına şunı äytäsem kilä. Şul kendeklären, kükräklären açıp çıqqan cırçılarnı çığarmasınnar ide. Böten çit illärgä dä qarawçı möselman xalqın mısqıl itü bula ul minemçä. Moña bik açuım kilä, yanam, köyam. ”
Şulay uq Vilson äfände üze yäşägän Sverdlau ölkäsendäge Acığol tatar awılınıñ tarala baruına üz borçuların belderde.
“Awılda eş bette xäzer, awıldan yäşlär kitä, sovxoz taralıp bette. Citäkçe ülgän ide, rayon üzägennän mafiä kilep böten äyberlärne talap beterdelär Mäktär, balalar baqçası bar, ämma anda balalar bik az yöri. ”
Menä bik ozaq yıllar buyı Tatarstannan yıraqta yäşägän Vilson Xafizov Qazanda äle ber genä tapqır bulğan. Qazanda bar da yaxşı, matur di ul. Ämma Qazan transportınnan qänäğät bulmawınnan äytte.
“2006 yılnıñ aprel' ayında min berençe tapqır Qazanğa barğan idem. Menä Qazanda ber bälä bar. avtobuslar tuqtalışlarda tuqtamıy, yä alar uzıp tuqtıy, yä bötenläy tuqtalışqa kilep citmiçä keşelärne utırtalar. Annarı tuqtalışlarnı tatarça iğlan itmilär. Qısqası, urıs basqan Qazannı. ”
Xörmätle “Azatlıq ”radiosı tıñlawçıları sez Svedlau ölkäseneñ Arta rayonınıñ Acığol awılında yäşäwçe Vilson Xafizov fikerläre belän tanıştığız. Ägär dä inde sezneñ dä äytäse fikerläregez, teläk – täqdimnäregez bulsa, bezgä xat yazu öçen adres - 420012, Qazan 12, abonent tartması 155. Bezgä şaltıratu öçen telefon nomerı 5-705 -246. Qazan kodı 843. Tıñlawçılarnıñ bezne iğtibar belän tınlawları “Azatlıq” eşen kamilläşterüdä zur yärdäm bulıp tora.
Gölnaz Şäyxetdin
