Köndezge ber tulıp ikençe kitkändä kiçen Qazan kirmänendä uzğan Rusiä däwlät şurası prezidium utırışında qatnaşırğa Sankt Peterburg gubernatorı Valentina Matvienko, Tübän Novgorod ölkäsennän Waleri Şansov,başqa türälär Qazanğa kilde. 13 säğät 30 minutta Rusiä federatsiäseneñ ölkälär üseşen citäkläwçe ministr Vladimir Yakovlev, Mäskäw merı Yuri Lujkov “Qazan” xalıqara hawa alanına ayaq bastılar. Alarnı xökümät başlığı Röstäm Miñlexanov citäkçelegendäge yuğarı däräcädäge qunaqlarnı qabul itärgä saylanğan törkem qarşı aldı. Ä menä Putin totqarlandı. Aña Qazanda sotsial' ipoteqa buyınça birelgän küp qatlı yortlarnı kürsätmäkçelär ide. Alarnı Rusiä prezidentı tiräsendä böterelüçe başqa türälärgä kürsättelär Ul yortlar yanına çırşılar utırtıp maturlağannarın respublikanıñ barlıq televidenieläre kürsätep çıqtı. Läkin köndezge 1 kilergä tieşle Putin äfändene, säğät 3 tä “Qazan” hawa alanında bula dip tınıçlandıralar anı kötüçe jurnalistlarnı. Barlıq räsmi çığanaqlar Rusiä prezidentınıñ qayçan kiläsen äytmilär, ul kilgäç nilär bulasın, aña närsälär kürsätäsen dä ser itep saqlıylar. Yuğarı qunaqlarnı qarşı alırğa, alarnı qunaq itärgä Tatarstan citäkçelege ayırım törkem tözede, ul törkemdä iñ yuğarı citäkçelär genä; xökümät başlığı, ministrlar, Qazan şähäre xakimiäte başlığı. Tatarstan däwlät şurası deputatlar da bu eştän çittä qalğan. Bezgä bolarnı irekle çığanaqlar citkerde. Putinğa Qazanda şulay uq yaña at sportı kompleksın, älege genä safqa basqan berdäm xisap üzägen kürsätmäkçe idelär. Tik Mäskäwdä cil-dawıl bulu säbäple Rusiä prezidentı kiçke 4 dä tulıp başqalada yuq ide äle. Putinnı Qazanğa kilügä iñ berençe berdäm xisaplaw üzägen qarar dip kötüçe jurnalistlar köndezge 1 birle ber urında taptanalar, tamaqları açıp betä. Bolarnı bezgä räsmi jurnalistlar belän elemtä totuçı irekle qäläm iäläre citkerde. Nihayät Rusiä il başı kiçke biş tulğanda “Qazan” hawa alanına ayaq bastı. Biş tulıp altınçıda Putinğa soñ bulsa da uñ bulsın dip yaña açılğan berdäm xisaplaw üzägen kürsättelär. Tatarstanğa kilgän Rusiä türäläre öçen Qazanda nilär genä qılanmadılar, şähär üzägendäge yullarnı zäñgär mögezle maşinalar belän çistartıp toru, adım sayın xoquq saqçılarınıñ uzğan barğannardan pasport sorap aptıratular, Qazan çitendäge çañğı şuu alanına ällä niçä “Qamaz” maşinası belän qar taşuları diseñme, barsı da buldı. Qayber jurnalistlar Putinnıñ soñarıp kilüeneñ säbäben hawa torışına ğına sıltap qalmıyça monıñ başqa säyer yaqları da bar dip farazlıylar. Mäsälän, Rusiä il başın terrordan saqlaw ğämäle dip tä añlarğa bula ikän. Qazanlılar öçen cil-yañğırlı küñelgä şom sala torğan hawa torışı, Putin kilä digän xäbär belän şawlağan bu kön Tatarstanğa kilgän Rusiä türäläre öçen däwlät şurasınıñ prezidium utırışı belän räsmi räweştä tögällände. İkençe könne alarnı Mintimer Şäymiev yubiley uñayınnan äzerlängän sıy-xörmät kötte.
Röstäm İsxaqi
