Qazan şähärendä tizdän çuaş mäktäbe açılaçaq. Bu xaqta düşämbe könne Tatarstannıñ mäğärif häm fän ministrlığınıñ yıllıq utırışında äytelde. Ğomumän respublikada törle millät balalarına belem alu öçen mömkinlek tudırıla. Törle yäkşämbe mäktäpläre eşläp kilä. Bu xaqta Mäğärif häm fän ministrlığınıñ milli mäğärifne üsterü bülege başlığı Räif Zinnätullin:
Xäzerge waqıtta 121 çuaş mäktäbe, bez anı etnomädäni mäktäp dibez. Şulay uq 22 mari mäktäbe, 45 udmurt, 4 mordva, 1 başqort, 1 yähüd mäktäbe eşli. Çuaş mäktäpläre bar ide, ämma alar yäkşämbe mäktäpläre ide. Bu isä gomumbelem birü mäktäbe.
Raif Zinnätullin belderüençä, härber millät balası üz ana telendä belem ala alsın öçen respublika häm Qazan külämendä programmalar eşlänä ikän. Şulay uq Tatarstanda keräşennär öçen dä mäktäp buldırılğan. Räif Zinnätullin:
Keräşen tatarlarıñnıñ etnografiäsen öyränü öçen TR Mäğärif häm fän ministrlığı tarafınnan maxsus programma eşlängän ide. Häm şuña nigezlänep ğalim Nikolay Maksimov “Bez ber tamırdan” digän däreslek tä eşläde. Ul mäktäplärgä täqdim itelde. Şunıñ nigezendä Alabuğanıñ Olı Şürnäk awılı mäktäbe bezneñ ministrlıqqa sistemalı räweştä keräşen etnomädäniäten öyränü mäktäben açu turında süz alıp barğan ide. Dekaber ayında bu açıldı, yäğni monda yaña predmetlar östälde.
Räif Zinnätullin äytüençä, Tatarstanda uqıtu öçen “Dinnär tarixı” digän uqu äsbabı da äzerlängän. Bu xaqta kollegiä utırışında mäğärif häm fän ministrı Räis Şäyxelislamov ta äytte. Ul xäzer älege fänne uqıtu öçen tiz arada uqıtuçılar äzerlärgä kiräklegen belderde.
Landış Xarrasova
