Eçke eşlär ministrlıygıyndagı militsiälärneñ gönahların terkäp baruçı, cäza birüçe bülek turında söylägänçe ber qızıqlı faktqa tuqtalıp kitik. Küptän tügel Qazanda Rusiä eçke eşlär ministrlığınıñ vedomstvodan tış saq xezmäte bülege wäkilläre il küläm seminarğa cıyılğannar ide. Bu oçraşunıñ näq menä respublika başqalasında ütüen, Tatarstannıñ vedomstvodan tış saq xezmäte Rusiä töbäkläre arasında dürtençe tapqır iñ aldınğı buluı belän añlattılar. Vedomstvodan tış saq xezmäte bik küp obyektlarğa, binalarğa üzeneñ tamğaların, signalların quyıp betergän. Kiräkmägän cirgä başın tıqqan, ayağın basqan xoquq bozuçını şunduq eläkterep alalar ikän. Ul oçraşuda Mäskäwdän Rusiä xoquq saqçılarınıñ ber citäkçese dä kilgän ide. Jurnalistlar Rusiä başqalasınnan kilgän qunaqtan, Tatarstannıñ eçke eşlär ministrı Äsxät Säfärovtan intervyu alalar, şulçaq “Yaña ğasır” telekanalı jurnalistı tatarça soraw birde, ä cawap bolay yañğıradı:
- Yuq, yuq tatarça kiräkmi, tatarça söylämim!!!
“Ni qızğanıç respublikanıñ eçke eşlär ministrlıysınnan tatarça fikerlär işetüe bik awır şul” – dilär tatar telle matbağa qäläm iäläre. Alay disälär dä, Säfärovnıñ urınbasarı Räfil Noğmanov bu yalğışlıqnı tözätä bulsa kiräk. Saq xezmäte turında ul menä nilär söylägän ide:
- Qazanda 50 meñgä yaqın fatir saqlıybız. Xalıq bezgä ışana, yärdämläşep yäşi biräbez.
Saq xezmäte turında söylägändä Sovetlar soyuzı waqıtındağı äytem iskä töşä, “ Minem militsiä mine saqlar”. Ä xoquq saqçılarınıñ rişwät alularınnan, wazifalarınnan qanunsız faydalanudan kem saqlar digän soraw tua. Älege sorawğa bu atnada başqalanıñ Eçke eşlär ministrlığı binasına jurnalistlarnı cıyıp cawap birergä tırıştılar. Respublikanıñ xoquq saqçıları belän idärä itüçe ministrlıykta, Äsxät Säfärovqa ğına buysına torğan şäxsi iminlek xezmäte bülege eşli ikän. Bu bülekneñ citäkçese polkovnik Sergey Çepuştanov äytüençä alar xoquq saqçılarınıñ eşçänlegen härdaim tikşerep toralar, qanun bozğannarın cawaplılıqqa tartalar yäki qara keläymä suğıp naçar militsionernı eştän qualar. Uzğan yıl xoquq saqçıları tarafınnan 140 cinayät oçrağı terkälgän, şunıñ 83nä cinayät eşe quzğatılğan. Militsionerlarnıñ tärtiplären tikşerüçe bülek citäkçese Sergey Çepuştanov, 2005 yıl belän çağıştırğanda uzğan yıl xoquq saqçıları rişwätlärne, wazifalarınnan tieşsez qullanunı 24 protsentqa kimettelär dip tä östäde. Tatarstannıñ neft' çığaruçı rayonnarındağı militsionerlar ayıruçı totnaqsızlanıp alğannar, rişwät alularnıñ küp oçrağı şul yaqlarda terkälgän. Yul xäräkäte iminlege däwlät inspeksiäsendä eşläwçelär arasında da yıraqtan qıçqırıp toruçı, blatnoy maşina nomerları satuçılar tabılğan. Tatarstan yullarındağı yanıp toruçı yäşel kiemdäge pogonlı duslarnıñ qayberläre şoferlardan 3000 sumğa yaqın rişwät alu belän militsiälärneñ tärtiplären tikşerüçe bülekneñ qara isemlegenä eläkkän. Rişwätne kübräk xalıq arasında yörüçe xoquq saqçıları ala ikän. Şul uq waqıtta 80gä yaqın eçke eşlär bülege wäkilläre rişwät aludan baş tartqannar, şunıñ öçen alarğa aqçalata premiälär birgännär.
Röstäm İsxaqi
