10 fevral'dä kompozitor häm cırçı Aygöl İsmäğilevağa 30 yäş tulğan bulır ide. 6 noyäber köndezge öçlär tiräsendä Çirmeşän rayonına yubiley kiçäsenä qaytıp barğanda Aygöl utırğan maşina Norlat-Älmät yulları kiseşkän çatta, yul häläkätenä oçrıy häm qıznıñ ğömere özelä. Aygöl belän maşinada tağın jurnalist İldar Kıyämov ta bula. Läkin bäxetkä ul isän qala. İldar Kıyämov:
Aygöl “Aq külmägem” törkemendä solist bularaq üsep çıqqan ide. “Qazan” milli mädäni üzägenä eşkä kilgäç bez bergä eşli başladıq. Aygöl muzıykal' tabiğät'le keşe ide, ul başta Qazan muzıka uçilişçesın skripka uyın qoralı buyınça, annan Qazan däwlät mädäniät häm sänğät universitetın xor dirijerlığı buyınça tämamlıy. Häm şuşı äzerlege aña säxnädä üzen irken totarğa mömkinlek birde. İldar Kıyämov 20 fevral'dä “Qazan” milli mädäniät üzägendä Aygöl İsmäğilevanı iskä alu kiçäse oyıştırılaçağın äytte. Anıñ başlanğıçında şağirä häm jurnalist Läylä Däülätova tora. Bu kiçädä Aygölneñ cırların estrada yoldızları başqaraçaq. Läylä Däülätova:
Aygöl inde säxnädä un yıldan artıq. Ul professional' muzıkant häm cırçı. Soñğı yılda ul köylär dä yaza başladı. Häm qızğanıçqa ul alarnı cırçılarğa tapşıra lamıy qaldı. Xäzer alarnı min başqaram. 20 fevral' könne bulaçaq konsertta anı cırçılar kilep başqaraçaq.Läylä Däülätova iskä alu kiçäsendä Aygölneñ berençe häm soñğı cırların işetep qalırğa mömkinlek bulaçaq. Anda cırçılar Xämdünä Timerğalieva, Alsu Xäbibullina, Röstäm Zakirov, Liliä Mullağalieva, Venera Şämieva, Vil Usmanov, Aygöl Barıyıva qatnaşaçaqların äytte. Aygöl İsmäğileva berençe çiratta osta muzıkant bulğan. Läylä Däülätova:
Ul böten uyın qorallarında uynıy ide: skripkada, garmunda, pianinoda häm üze tere tawışqa cırlıy da ide. Ul barlıq xalıq häm estrada cırların da irken başqara ide. Läkin menä ni öçen ul populyar bula almıyça qaldı? Çönki ul bik tıynaq keşe ide. Annan soñ ul kongress, “Qazan” milli mädäni üzäge oyıştırğan bar konsertlarda da qatnaşa ide.
Şağirä, jurnalist Läylä Däülätova üze dä Aygöl İsmäğilevanıñ berniçä cırın başqara. Läylä Däülätova
Ğädättä kompozitor süzgä köy yaza, läkin Aygöl bolay ğına köy yaza ide. Dimäk anıñ köylärenä telägän şiğerne quyıp bula digän süz. Bu inde cırnıñ uñışlı bulaçağına dälil. Läylä Däülätova Aygölneñ ütä dä talantlı buluın assızıqlıy. Häm anıñ ğomere özelmäsä ul äle yoldız bulıp balqır ide. Yul häläkätennän soñ Aygöl İsmäğilevanı Çirmeşängä, annan soñ Qazannıñ 15 nçe xastaxanäsenä kiterälär. Xäle yaxşılana digändä genä, 5 könnän soñ ul can birä. Xastaxanädä söyäq celege qan tamırına kitep qanı ağulanğan dip añlatqannar. Waqıtında döres yärdäm kürsätelsä bolay bulmas ide häm Aygöl isän qalğan bulır ide diyuçelär dä bar.
Landış Xarrasova
