Fevral' başında Qazanda eşli başlağan möslimälär basseynı küp kenä jurnalistlarnı, xätta Mäskäw yazuçıların da bitaraf qaldırmadı. Äledän-äle gäcit bitlärendä, internet çeltärendä törle uydırmalar belän yazmalar çığıp ğadi xalıqnı da, möslimälärne dä ğäcäpländerä. Xätta Mäskäwdäge yazuçı Mariä Arbatova bu feodal ileneñ bilgeläre häm xatın-qıznıñ xoquqın bozu dip atadı. Şul uq waqıtta Qazanda basseynğa yörergä tezläwçelär artqannan-arta ikän. Kiläse aydan bu eşne tağın da kiñäytü küzdä totıla. Akvaayrobika, trenajerlar zalı da bulaçaq.
Möslimälär, yäğni yaulıqlı xatın-qızlar här şimbä könne Qazannıñ Rotornıy basseynında qoyına. Moña qädär Orgsintez basseynında möselman yegetläre yörgän ide. Küplär öçen bu büleneş ğäcäp ber şaqqattırğıç närsä buldı. “İnterfax” agentlığı da, “Rossiyskaya gazeta” da bu xaqta törle qaraşlar beldergän keşelärneñ fikerlären yazıp çıqtı. Mäsälän, Mäskäwdä kitaplar yazuçı Mariä Arbatova bu xälne möslimälärneñ psixik sälämätlegenä zıyan kiterergä mömkin häm kiem belän su qoyınu bu artta qalğanlıq ğälämäte dide. Şulay uq ul här keşe irekle, bu xatın-qıznı ayırım ber qısalarğa kertü dip assızıqladı. Bilgele ki, aña Tatarstan möslimälär Berlege räise Nailä Cihanşina cawapsız qala almawın äytte. Ul yazuçı Arbatovanıñ bu fikerlären dälilsez häm ädäple-äxlaqlı möslimälär öçen bötenläy yat buluın belderde. Şulay uq ul Mariä xanımnıñ üzen dä Qazanğa basseynğa çaqırdı. Äytergä kiräk, älege basseynğa tänen, yäğni ğaürätlären kürsätergä oyalğan här xatın-qız yöri ala - möslimälär genä tügel. Çönki bu basseyn berençe çiratta sälämätlek yağın istä totıp buldırılğan. Güzäl zatlarnıñ kübese berniçäşär bala taba, şuña sälämät yäşäw räweşen buldıru bik möhim. Bu xaqta Tatarstan möslimälär Berlege räise Nailä Cihanşina:
Bik küp möräcäğätlär kilde. Xatın-qızlar sälämätlekne saqlap qalu öçen basseynğa yörergä kiräk didelär. Bez şähärneñ ber basseynına möräcäğät itkäç arendağa 2 säğät waqıt birdelär. Xäzer anda 2 törkem şöğellänä. Bäyäse isä 140 sum.Nailä Cihanşina kiläçäktä bu yunäleşne cäyelderü küzdä totıluın äytte. İkençe aydan basseynğa 3 törkemne dä oyıştıraçaqbız.
Bügenge köndä basseynğa yörüneñ iñ zur probleması ul - kupal'nik, yäğni su qoyınu kieme, çönki alar Qazan kibetlärendä satılmıy diärlek. Anı yä möselman illärennän alıp qaytu, yä inde tekterü taläp itelä. Nailä Cihanşina:
Ul kiem yabıq bulırğa tieş häm başlıq kiräk. Şulay uq ul kiem üzendä sunı totmıy häm anıñ belän qızınırğa da mömkin.Tatarstan möslimälär Berlege räise Nailä Cihanşina äytüençä, yözä belmäwçelär öçen maxsus öyrätüçe dä bar ikän. Bu basseynda möslimälär bulğanda ber genä ir yeget tä kertelmi.
Landış Xarrasova
