“Şähärneñ çın yözen açıp sala torğan ike äyber bar. Berse bala tudıru yortları bulsa, ikençese zoopark”,-dide rässam Aleksandr Şadrin. Bez anıñ belän Qazan milli mädäniät üzägendäge xaywannar dönyasına bağışlanğan kürgäzmädä tanıştıq. Fevral' urtasında açılğan bu kürgäzmä 5- martqa qädär eşläyäçäk.
Bu kürgäzmä aşa zoopark problemalarına kiñ cämäğätçelek iğtibarın cälep itü bezneñ töp maqsatıbız ide. 2008 yılda anda bit üzgärtep qoru, yäğni rekonstruksiä kötelä. di Şadrin. Anıñ bu kürgäzmägä berniçä räseme quyılğan. Alar fotograf Aleksandr Çikin belän 150-läp foto, 40 näqeş, grafika häm berniçä sınnı 18 keşeneñ icatın ber urınğa tuplap bu kürgäzmäne çittän yärdäm almıyça, üz aqçalarına aça aluğa bik söyenälär.
Änä keçkenä Märyämgä bu kürgäzmädä balıqlarnıñ ağaçtan qırılğan sınnarı bigräk tä oşağan ikän. Yulbarıslarnıñ fotoların da yaratıp qarağan ikän ul. Änise Rumiä xanım äytüençä, alarnı yäkşämbeneñ zämhärir suığı da örketmägän.
Bu xaywannar dönyasına bağışlanğan kürgäzmäne härkem üzençä qabul itä. Yäşüsmer Kolya äytüençä, alar ğailäse öydä et, mäçe totmasa da xaywannar dönyasın bik yarata ikän.
Min xaywannarnı bik yaratam. Yırtqıçlar arasınnan arıslannar bigräk tä küñelemä xuş kilä. Qazan zooparkına da bik yış yörim. Yırtqıç canwarlarnı yaratqanğa, miña bezneñ zooparktağı alarnıñ çitlekläre bik ük oşap betmi. Min alarnı bik qızğanam. Menä mondıy kürgäzmälärne oyıştıru çitleklärne dä yaxşırtırğa tä'sir itäder dip uylıym. Älege kürgäzmädä Bügenge kön Mauglie rässam Al'fred Şäymardanovnı da kürergä mömkin. Şäymardanov üzeneñ räsemendä isä, Qazan kirmänendäge Dali tuyı tä'sirläre belän urtaqlaşa. Aleksey Nazarovnıñ mexanik balıqları cirgä häläkät yanawın kisätä. Ğomumän kürgäzmädäge här sänğät äsärendäge canwar da bezneñ yazmış sezneñ qulda dip äytä sıman.
Uramda bik salqın bulğanğa yäkşämbe könne alğan tä'sirlär belän düşämbe könne Qazan zooparkındağı canwarlarnıñ xälen belü öçen anda şaltıratıp qarağan idem, mödir urınbasarı Güzäl Mägsüd qızın köne buyı ezläsäm dä tota almadım. Tik iqtisatçı yeget Marat qına- “Vrode bı normal'no perenosyat xoloda”,- dip cawap birde.
Suıq digännän, Qazan milli mädäniät üzägendäge bu xaywannar dönyasına bağışlanğan kürgäzmä iñ cılı bülmägä urnaşqan. Anıñ yanındağı Anatoliy Sıysoev räsemnäre häm sınnarı quyılğanına kersäñ der qaltırıy başlıysın. Ä Qazannıñ 1000 yıllığı muzeyında suıqtan tuñıp yaulığına törengän qarap utıruçı apa, min köndezge 3-nce yartıda kilep kergäç, sin berençe keşe balaqayım, bügen keşe kilmäs tä inde, dip ozatıp qaldı.
Nail Alan
