Uzğan atnanıñ soñğı könendä Mäskäwdä, Mäskäw ölkäse häm Mäskäw milli mädäni möxtäriätläre yäşlär forumı uzdırdı. Bu forumğa Qazannan Bötendönya tatar kongressı häm bötendönya tatar yäşläre forumı wäkilläre dä kilgän ide. Läkin, Mäskäw forumınıñ ğomum utırışı urınına bilgele millättäşlärebezne tuğan könnäre belän qotlap, balalar konsertı kürsätü belän genä çiklänü, Qazan qunaqların da aptıraşta qaldırdı. Bu xaqta bötendönya tatar yäşläre forumı räise İlşat Säitov: “ Bez bu forumğa bik söyenep kildek. Läkin yäşlärneñ az buluı borçıy beraz. Min Mäskäwdä baytaq qına yäşlärne beläm. Läkin alar bu forumnan xäbärdar tügel. Bälki bu xaqta kübräk keşegä belderergä kiräk bulğandır.” dide.
Äytkänemçä yäşlär utırışınıñ programması xaqında söyläw fiker alışu bulmadı, eşne alar seksiä utırışları belän başlap cibärdelär. Forum dip atalğan bu cıyında 3 seksiä – eşquarlar, tarix mäğärif, şulay uq mädäniät, ruxi tärbiä seksiäläre eşläde. Mäskäwdä 14 artıq yäşlär oyışması bulsa da, forumda alarnıñ bik az buluı häm küpçelek yäşlärneñ eşquarlar seksiäsen saylawı da forumnı maqsattan çitläşterde kebek. Şulay da tarix, mäğärif seksiäsen alıp barğan professor Äxtämcan, yäşlärneñ tuğan telgä, ädäbiätqa omtılışların bilgeläp ütkän. Läkin belemnäre az, yaña kitaplarnı belmilär. Mondıy oçraşularnı yılğa ber tügel, ay sayın uzdırırğa kiräk, di professor. Professor Abdulxan Äxtämcan seksiäsendä 15 keşe bulsa, “Mädäniät, ruxi tärbiä” seksiäsenä ber keşe dä kilmägän bulıp çıqtı. Bu xaqta ul utırış öçen cawaplı bulğan Roza Xäbibullina: “ Bu xäl mine bik borçıy. Yäşlär mädäniätebez belän qızıqsınmıylar. Şulay disäm dä, bälki alar tatar milläteneñ möşkelräk yaqların kürep, mädäniät äle bezsez dä buldıra ala dip uylıylardır”, dide.
Seksiä utırışınnan soñ yäşlär yañadan cıyılıp, wazğiätne beraz tözättelär kebek. İkençe forumnı äzerlär öçen 9 keşedän torğan şura buldırıldı. Häm Mäskäw, Mäskäw ölkäse yäşläreneñ liderı itep yäş eşquar Rawil Safiullin saylandı. Anıñ urınbasarı bulıp, yäşlär belän eşlärgä atlığıp torğan yäş imam Ruşan xäzrät Äbbäsov bilgelände.
Şulay itep, Mäskäwdä uzğan berençe yäşlär forumı küplärne cälep itügä ireşä almasa da, maqsatların beraz yaqınayttı. Citäkçelärne saylap quyu ğına da bu oçraqta zur ähämiätkä iä dip äytergä kiräk.
Näzifä Kärimova, Mäskäw
