Rusiädä açıq xatlar yazu, il citäkçesenä matbuğat çaraları aşa möräcäğät itü ğädäti xäl. Menä islam dine wäkilläre dä şuşı ısul belän Vladimir Putinğa üz fikerlären işetterde şuşı könnärdä. Vladimir Putinğa açıq xat İzvestiä gazetasında 5 mart könne dönya kürde. Ul reklama xoquqlarında, yäğni aqça tüläp bastırılğan. Küräseñ, başqa küpsanlı açıq xatlardan ayırmalı bularaq, älege möräcäğätne tüläwsez bastırırğa urın tabılmağan. Xatnı İslam komitetı räise Geydar Camal, Rusiäneñ Möftilär şurası räistäşläre Nafiğulla Aşirov, Möqätdäs Bibarsov, Kareliya möselmannarı Diniä näzaräte başlığı Visam Ğäli Bardvil, Rusiä Däwlät Duması deputatı Şamil Soltanov, İslam.ru portalı redaktorı Marat Säyfetdinov, Maxaçkala şähäre imamnarı Şurası räise Möxämmädräsul Saaduev häm Rusiäneñ distälägän töbägennän 3 meñnän artıq keşe imzalağan.
Vladimir Putinğa yullanğan açıq xatta Rusiädä möselmannarnı cäberläw, qanun bozıp alarnı ezärlekläw oçraqları xaqında süz bara. Häm Rusiä konstitutsiäse garantı bularaq, prezidenttan ilneñ xalqına din totu ireklegen tä’min itüdä yärdäm sorala. Ayırım alğanda, xat avtorları Pyatigorski şähäre imamın törmägä yabılu, islam belgeçe Säid Nursı kitapların tıyu, Ästerxandağı tözelä başlağan mäçetne cimerü häm başqa şundıy oçraqları turında yaza. Bu eşlär barısı da Rusiä doşmannarı tarafınnan ilneñ berdämlegen qaqşatu, dönya häm İslam illäre aldında Rusiäneñ däräcäsen töşerü öçen eşlänelä, dip yaza ber törkem islam dine ähelläre.
Äytergä kiräk, älege xatta Tatarstannıñ din ähelläre imzaları kürenmi. Bu möräcäğätkä respublika Diniä näzarätendä nindi mönäsäbättä tora soñ, alar anda äytelgän fikerlärne xuplıymı? Şuşı xaqta bez respublika möselmannarı Diniä näzaräte räiseneñ berençe urınbasarı Wäliulla xäzrät Yaqubtan soraştıq.
Şundıy ütä dä säyäsiläşkän räweştä eşlämäskä ide minemçä. Çönki telibezme, telämibezme, bezgä äle küp yıllar däwamında şul uq Rusiä xakimiäte organnarı belän aralaşırğa kiräk. Bezneñ din başlıqlarıbız Rusiägä näfrät kürsätüçe dokumentlar imzalıy ikän, bu ğadi möselmannarğa tiskäre yoğıntı yasamıy qalmas. Ägär dä inde sin din ähele ikän, sin çamalap qına eş itärgä tieş, alarnıñ nindider säyäsi köräşkä totınuı minemçä döres tügel. Döres, xäzer Rusiä küçeş çorında. Xoquqı däwlät äle tözelä genä. Şuña da, Rusiäne islamğa qarşı däwlät itep kürsätü, anıñ xoquqı sistemasın inqar itü möselmannarnıñ üzlärenä dä faydalı tügelVladimir Putinğa möräcäğät itelgän xatta tatarstanda möselmannar östennän alıp barılğan cinayät eşläre xaqında da süz bara. Ayırım alğanda, xat avtorları Çallıda Säid Nursi kitaplatın tıyu, Bögelmä gaz ütkärgeçendäge şartlawlarda möselmannarnı ğäyepläw oçraqları xaqında äytelä. Bu xaqta Wäliulla Yaqup fikere.
Ägär inde nindider oçraqlar bar ikän, bez alarnı barıber mäxkämä qısalarında, Rusiäneñ xoquqı qırı bezgä birä torğan çiklär faydalanıp eşlärgä tieş, minemçäŞulay itep, Tatarstan möselmannarınıñ Diniä näzaräte räiseneñ berençe urınbasarı Wäliulla Yaqup mondıy räweşle ısullar Rusiädäge möselmannarnıñ xälen ciñeläytmiäçäk, dip sanıy. Häm xakimiätlär belän xezmättäşlekkä çaqıra. Rusiä citäkçelege dä üzläre belän urtaq tel tapqan möselman din ähellären üpkälätergä cıyınmıy kebek. İrekle fiker äytep, xakimiätlär telämägän ğämällär qılmağanda, älbättä. Läkin islam dinen Rusiä citäkçelege kebek añlamağan möselmannarğa nişlärgä qala? Monda prezidentqa möräcäğät kenä yärdäm itä almas şul.
Gölnaz İlgizär
