Xäniä Färxi yaña konsertın täqdim itte

Qazan şähäreneñ Bauman uramındağı yoldızlar alleyasında avgust axırında 5 poçmaqlı yoldızı quyılğan Xäniä Färxi üz törkeme belän qazanlılarğa 5 kön rättän konsert quydı. Oçraqlı turı kilüme, ällä monıñ başqa sere barmı?

Yoldız bötenläy kötelmägän äyber buldı. Häm zur cawaplılıq. Şulay uq isän-saw çağında keşeneñ qäderen belep qalu. Küplär satıp alınğan dip äytsä dä, min säxnädä eşlägändä minem aldan ber qayçan da aqça yörmäde. Minem xezmätem, eşem buldı. Annan danım, Allağa şöker!

-Elek 5-ne quya idegezme? Ällä kübräkme?

-Gabdelxäyneñ teläge şulay buldı. Ällä xalıq bulmas dip borçıldı mikän… Xalıq bar-yöri ul. Xalıq uramda qaldı. Min äle Rusiä buylap yörep qaytqaç Qazanda tağın quyarbız. Niçä yıllar buyı şul ber Xäniä bit inde ul.

Xäniä Färxi xatın-qızlar arasınnan iñ küp “Altın bars” bülägenä iä bulğan cırçı da. Bu büläk aña 7 tapşırılğan. Anıñ mart başında Qazanda täqdim itelgän yaña konsert programması “Yäşik äle” dip ataldı. Tamaşa başında uq ul bıyıl Tatarstanda xäyriä yılı ikänlegen äytep uzdı. Kürenekle cırçı üze berär xäyriä çarası ütkärergä cıyınamı soñ?

Äytkän niätem bar. Qazanda bik moxtaclar öçen ber konsert quyarğa. Törle tamaşaçılar bar bit. Aqçaları bulmağan äbilär, aqça cıyıp, üz-ara lotereya uynap, minem konsertqa ber wäkilne citbärü turında da säxnägä menep söylädelär. Min anı uylıym. Älegä Gabdelxäy belän söyläşülär alıp baram. Buşlay konsert quyu ul zur çığımnar sorıy.

Cırçı äytkän süzendä torsa, bälki közen, bälki qış başında fäqirlär öçen buşqa konsert quyarğa cıyına. Ä bu yaña ğına tämamlanğan konsertları isä, Qazanda soñğı ike yıl eçendä berençese ikän. Säbäp närsädä? Ällä yıl da bulsa tamaşaçı kilmäs dip qurqamı?

Geografiä zur bulğanğa Qazanda ike yılğa ber konsert quyarğa turı kilde. Böten Rusiäne äylänep çıqqançı ike yıl ütkän dä kitkän. Äle Omski, Tomski, İrkutski, Novosibirski yaqlarına da çaqıralar. Annan soñ Qazaqstan, Üzbäkstan yaqlarına da barıp qaytasım kilä. Taşkentnı elek bezneñ millättäşlär, tatarlar üz qullarında tota ide. Alar qaytıp bette inde. Ä bit ğadi xalıq qaldı.

-Nigäder imidjıyğız üzgärmi...

-Sez sorasın dip. Tarix ul minem dip tä äytep qarıym. Säxnädä üz imidjıñnı tabu ciñel tügel. Çäç yasawçı ostalar xäzer gel zarlana. Çäçemne Xäniäneke kebek yasağız, dip kilüçelär kübäygän ikän. Älegä çäçem şul kileş qalsın, tağın ber yaña mögez çığarğançı.

Xäniä Färxi üze äytmeşli, bu soñğı tamaşasında da mögezle äyberlär küp buldı. Xalıq haman da köyläp yöri torğan “Äldermeşkä qaytam äle”ne tamaşaçı cırlı myuzikl başlanğıçı bularaq qabul itte. “Yäşik äle” programması tatar estradasında yaña yunäleş - cırlı kölkele küreneşlärgä bay ide.

Ber myuzikl eşlisem kilä. Min anı ciñep çığarbız dip uylıym. Bälki kiläse yılğa uq bulaçaq yaña konsert programması myuzikl bulır. Ämma törle yaqtan xalıq qabul itä alırlıq äsär quyu bik ciñel eş tügel. Minem konsertqa tirä-yaq awıllardan kolxozçılar da kilä. Uqıtuçılar, ğalimnär, zavod eşçeläre, ministrlar qarıy bit. Härberse añlarlıq itep quyu ciñel äyber tügel bit.

di mart başında Qazanda “Yäşik äle” dip atalğan üzeneñ yaña konsert programmasın täqdim itkän Tatarstannıñ xalıq artistkası Xäniä Färxi.

Nail Alan