Rusiädä genä ütkärelä torğan 8 mart xatın-qızlar bäyräme aldınnan, kiçke cide tulırğa unbiş minutta Arça üzägendäge azıq-tölek bazarında zur yanğın çığa. Yaqınça 300 kvadrat metr mäydanlı, säwdä üzäge tulısınça yanıp betsä dä, bu xäbär respublikadağı ber genä mäğlümat çarasında da yañğıramadı. 7 mart kiçendä Arçada hawa torışı da tınıç bulmıy, cille hawa yanğınnı kürşe binalarğa azdan ğına küçermi qala. Yanğın sünderüçelärneñ tırışlığı yärdämendä bazar qırıyındağı toraqlarğa zıyan kilmi qaldı di arçalılar.
- Yanğın sünderüçelär cähäträk eşlämägän bulsa tağın da zurraq bälä bulırğa mömkin ide.
Cirle yanğın sünderüçelärgä yärdämgä Saba, Baltaç, Ätnä rayonnarınnan ut sünderü maşinaları kilä. 15кә yaqın texnika utlı ätäç belän köräşä.
İt, qazılıq eşlänmäläre, toqmaçlar, başqa tör azıq-tölek tovarların eşmäkärlär bäyräm aldınnan muldan alğan bulalar. Alarnıñ barsı da kölgä äylänä:
- Bik qızğanıç xäl. Kübese şul kredit alıp eşlägännär. Xäzer alarğa eş urınnarı tabu belän şöğellänäbez. Bulmas mikän dilär protsentsız aqça birep torular.
Di Arça munitsipal' rayonınıñ başqarma komitetı räise İlşat Ğalimullin. Arça bazarı respublika zurlığında qarağanda ber noqta ğına bulıp kürenergä mömkin. Yuğarı citäkçelär dä Tatarstandağı bazarlarnı beterü säyäsäten alıp baralar. Ä bit xalıqnıñ kübese azıq-tölek alırğa arzanlı säwdä noqtasına bara. Bügenge köndä arzanlı aşamlıqlarnı bazarda ğına alıp bula. Arçalılar öçen kölgä äylängän bazar azıq-tölek satıp alu, tamaq tuydıru, aqça eşläw urınına äylänä. 5-6 yıl elek bazar bularaq eşli başlağan binanı qullanuçı 27 eşmäkär 59 satu urının yuğalta. Härberseneñ ikeşär-öçär satuçısı eşsez qala. Cirle qaznağa salım tüläp toruçı eşmäkärlär kübese tovarların iminiätläştermägän bula. Arça satuçılarnıñ ğailäse eş ezläw mä’säläse belän şawlasa, säwdägärlär yuğaltqan aqçaların kire qaytaru belän baş watalar.
Yanğınnıñ kilep çığu säbäplärenä kilgändä, arçalılarnıñ qayberläre bu bazarğa ut törtmägännär mikän dilär. Rayon xakimiätendägelär mondıy imeş-mimeşlärne älegä kire qağa.
Arba watılsa utın, sıyır ülsä it dilär, läkin bu arçalılarğa bik ük turı kilmäs ide. Burdan qala uttan qalmıy dip äytüläre şuşıdır inde ul.
Röstäm İsxaqi
