Xäläl rizıqlar, qazılıq citeşterüçe şirqat'lär ay sayın 30-40 protsentqa kübräk rizıq çığara ikän. Alarnı citeşterügä ük kibetlär alıp kitep baralar, xätta suıtqıçlarğa da quyarğa citeşmi it şirqat'läre. Xälälgä ixtıäc zur buluı xaqında bügen “Tatar-inform” agentlıysında uzğan matbuğat oçraşuında Tatarstan möselmannarı Dini Näzaräteneñ “Xäläl” standart komitetı citäkçese urınbasarı Röstäm Xäbibullin äytte. Tizdän Qazanda barı xäläl äyberlär genä satıla torğan zur säwdä üzäge açılır dip farazlana. Äzerlek eşläre inde başlanğan. Anda xäläl digändä küzallanğan it rizıqlarınnan tış, möslimälärgä bizänü äyberläre, kiem-salım, täm-tomnar häm başqa küp kenä äyberlär satılaçaq. Bilgele Tatarstanda xäläl üseş ala. Monı çit illärdä dä sizemläp alğannar. Nik digändä Malayziä investitsiälär biräçägen wäğdä itkän. Añlaşıla ki, tabışsız yunäleşkä berkem aqça birergä aşıqmıy. Bu xaqta “Xäläl” komitetı citäkçese Röstäm Xäbibullin:
Malayziädän törle täqdimnär belän eşmäkärlär çıqtı. Alarnıñ kerteläçäk investitsiäläre 1 milliard dollarğa yaqın. Xäzer bez alarnıñ täqdimnäre buyınça söyläşülär alıp barabız. Qayber şirqat'lär tulayım xälälgä genä küçärgä dä riza. Xäzerge waqıtta Tatarstanda “Xäläl” komitetqa 22 oyışma terkälgän. Alarnıñ barısı da xäläl citeşterügä rizalıq alğan. Tağın 30 şirqat şundıy uq bilgelämä alu öçen ğariza birgän. Monda Tatarstan ğına tügel, ä Rusiä töbäklärendäge şirqat'lär dä kerä. Mäsälän Yoşkar-Ola şähärendäge it kombinatı qazılıqları inde küp ölkälärgä mäğlüm.
Rusiä Bötendönya Säwdä Oyışmasına kergäç, küp kenä it kombinatları köndäşlekkä sälätle bulmıyça, zarar kürergä mömkinnär, ä xäläl produksiä çığaru alarnı isä saqlap qala alaçaq dielde matbuğat oçraşuında. Bu xaqta Röstäm Xäbibullin:
Çit illär üz produksiäse belän kerep böten bazarnı alaçaqlar, çönki beznekelär köndäşlekkä sälätle tügel. Ä xäläl produksiägä ixtıc zur. Dimäk, beznekelär monıñ belän otaçaq.Röstäm Xäbibullin äytüençä, möselmannar arasında xäläl qazılıqlarğa da şiklänep qarawçılar bar. Yäğni, qayberäwlär xäläl dä xäräm da ber cihazlar belän eşlänä dip sanıy. Xäläl komitetı wäkile äytüençä, it kombinatları cihazları kiçtän yaxşılap yuıla, ä irtän berençe bulıp alarda xäläl rizıqlar eşlänä ikän. Şuña şikläner urın yuqlığı bilgelände.
Landış Xarrasova
