Qazanda Näwrüz bäyräme 22 martqa küçerelde

-Bäyrämgä dip kildek monda. Näwrüz bäyräme. Üzbäklärneñ, taciklarnıñ çäçügä çığa torğan bäyrämnäre. Berençe tapqır ğına kiläbez äle. Kilgänebez yuq ide.

-Min eşlim Ğäliäskär Kamalda. Äytkännär ide, kilegez bäyräm bula bügen didelär. 12 dä. Şul bäyräm öçen kilgän idem. Nigäder tınıç äle monda. Başlanır äle.

-12 dä başlana digännär ide. Bäyrämne kötep utırabız. Kürenmilär bit äle.

-Bügenge bäyrämneñ mäğnäsen niçegräk añlıysız?

-Yaz bäyräme dip añlıym min anı. Min anı äle berniçä yıl elek kenä beläm. Kilgänem bulmadı. Televizorlardan, radiodan ğına işetep beläm.

-Bırğılar uynap tora ide monda. Keşe yuq. Keşe cıyılmıy bit. Muzıka uynap torsa xalıq cıyılır ide.

-Tatar qızları biep torsa keşe cıyılır ide. Bäyräm kebek tä tügel äle poka.

-Mätäm köne sez işetmädegez meni?

-İşettek anı da. Bäyrämdä nişlätäseñ inde. Böten keşeneñ başınnan ütä torğan ni bit inde ul. Anı bit bez uylap çığarmağan. Böten cirdä bula inde andıy ğına nilär. Min 10 yılğa yaqın kiläm monda.

Qamal teatrı yanında 21 martta Rusiädä iğlan itelgän matäm, qayğı könen işetkännär dä, bu turıda xäbärdar bulmağannar da bar ide. Barlığı 100- läp keşe teatrlaştırılgan küreneşne, cırçılar Rezidä Şäräfiova, Aydar Gabdinov, Ruslan Bahadur häm başqalarnıñ çığışın kötte. Tatarstannıñ räsmi saytı bäyräm 12 dä başlana dip ällä qayçan uq xäbär itep quyğan ide. Tik cıyılğan xalıqqa añlatu, ä bäyrämneñ 22 martqa küçerelüe turında belderüçelär kürenmäde. Qamal teatrı qarşındağı mäydanğa kilüçe xalıq belän söyläşep, äñgämälär qorıp yörgän “Efir” teleşirkäte jurnalistı El'vira Şäräfieva yılğa ber genä bula torğan kön uñayınnan ütkärelergä tieş bäyrämne ikençe köngä küçerülärenä rizasızlıq belderde.

Min tatar qızı bularaq, şunı äytäsem kilä. Bez inde öyrängän 21 mart könne bu bäyrämne. 22- senä küçerü yaxşı tügel inde minem öçen.

Bu bäyräm ütkärüne Qazan şähäre mädäniät işaräse, Tatarstannıñ milli-mädäni oyışmalar assotsiatsiäse häm Xalıqlar duslığı yortı üz östenä alğan. Mädäniät işaräseneñ baş belgeçe Azat Afzalov belän töştän soñ bäyläneşkä kerdek häm ni öçen Näwrüzneñ 22- senä küçerelüe turında xalıqqa iğlan itep toruçı bulmadı dip soradıq. Ul:

Bu çaranı oyıştıruçılar milli-mädäni oyışmalar assotsiatsiäse häm Xalıqlar duslığı wäkilläre 22- senä küçerelü turında mäğlümat çaralarına iğlan itep torırğa tieş ide. Alar miña köndezge ikençe yartığa qädär anda buldıq dip äyttelär, dide.

Ämma bez anda bulğanda, oyıştıruçılar 10 da uq qaytıp kittelär dip äyttelär. Ä bäyräm qararğa etläwçelär säğät berençe kitkändä dä Qamal teatrı qarşındağı mäydanğa taba kilä ide.

Nail Alan