“Azatlıq” radiosınıñ “Yaña ğasır” öçen maxsus äzerlänä torğan 20 minutlıq xäbärlär cıyılması sişämbe könne efirğa çıqmadı. 1 marttan “Azatlıq”nıñ ber säğätlek efir waqıtı 20 minutqa qalğaç radiotıyñlauçıylar belän elemtä kimede. Sişämbe “Azatlıq”nıñ daydjesı çıqmawğa qaramastan Qazan byurosına xalıqtan şaltıratular bik az kilde.
Professor İldar Nizamov Qazan däwlät universitetında alıp barğan däreslärendä yäş jurnalistlarğa “Azatlıq” radiosı xaqında yış iskä ala ide. 1 marttan “Azatlıq” “Yaña ğasır”da efir waqıtı qısqarğaç jurfak studentları İldar Nizamovnı yaratıp tıñlarğa ölgergän radiosı öçen nıq qayğırıp yörde didelär. Annan ul “Azatlıq”nı qısqa dulqınnardan ezläp qarağan, taba almağan, 20 minutlıq daydjest qına anı qänäğätländermi ikän. Şunnan inde İldar Nizamov üzeneñ borçulı- sorawlı uyların “Mädäni comğa” gazetasınıñ mart ayınıñ soñğı sanına ayazırğa bulğan. Älegä ul san dönyağa çıqmadı, çıqqaç gäcit uquçılar İldar Nizamov fikerläre belän tulıraq tanışa alır. Äytkänebezçä, sişämbe 27 martta “Yaña ğasır”da “Azatlıq”nıñ quşımtası efirğa çıqmıy qaldı. Nigä bolay buldı digäç, texnik säbäp dip añlattılar. Kompyuterlar belän urtaq tel taba almadıq, başqa andıy xatalar bulmas dip ışandırdı “Yaña ğasır”lılar. Şunnan soñ bez, “Azatlıq”nıñ Qazan byurosına üze yış şaltıratqan, soñğı aylarda şaltıratmıy başlağan, küp yıllar buyı “Azatlıq”nı tıñlap kilüçe Qazannıñ Tınıçlıq bistäsendä yäşäwçe İlyas abzıy belän söyläşep alırğa buldıq.
- Elek bik yaratıp tıñlıy idem, xäzer küñel qayttı.
Qısqa dulqınnardan nigä tıñlamıysız digäç, minem radioda qısqa dulqınnar yuq di İlyas abzıy.
Bu Qazanda yäşäwçe “Azatlıq”nı yuğaltıp baruçı ber tıñlawçıbız ide. Tatarstannıñ başqa rayonnarındağı “Azatlıq”nı “Yaña ğasır”dan tıñlağan xalıq bügenge köndä aptıraşta ikän. Ayıruça Piträç, Balıq bistäse, Teläçe rayonnarınnan şaltıratular, moñ zarlar yış kilde. Yäşlärdän tügel, ölkän buınnan. Alarğa “Azatlıq”nıñ ber säğätlek tapşıruın qısqa dulqınnardan, internettan tıñlağız digän idek. Qısqa dulqınnardan tıñlap qarawçılardan mondıy cawap yañğıradı:
- Min totıp qarağan idem qısqa dulqınnardan läkin bik naçar işetelä bit. Bötenläy işetelmi diärlek.
Tatar ictimaği üzäge räise, cämäğät eşleklese Tälğät Bariev äytüençä:
- Salqın suğış yıllarındağı kebek xäzer irekle mäğlümat çaraların qısu, beterü bara.
“Azatlıq”nıñ “Yaña ğasır”da efir waqıtı qısqarğaç, soraştırulardan kürengänçä küp tıñlawçılar bezne yuğaltqan ikän. Tatarstannıñ çittäge rayonnarında äbi-babaları torğan Qazandağı tatar yäşläre arasında “Yaña ğasır”dan “Azatlıq” qısqarğaç babayğa infark bula yazdı dip tä äytüçelär buldı.
Röstäm İsxaqi
