Qazanda bu könnärdä çirattağı zur xalıqara çara bara. Tatarstanğa EvrAzes – Evropa-Aziä iqtisadi berlege wäkilläre cıyıldı. EvrAzes – Evropa-Aziä iqtisadi berlegenä Rusiä, Qazaqstan, Qırğızstan, Belarus’, Üzbäkstan häm Tacikstan kerä. Bu oyışmada äğza illär arasında iqtisadı xezmättäşlek, urtaq säwdä bazarın buldıru, bäyälär, tariflar häm başqa şundıy mäs’älälär tikşerelä. Menä şuşı berlekneñ finans-iqtisad säyäsäte Şurasınıñ IV utırışına cıyıldılar Qazanda 6 aprel könne. Cıyılış şähärneñ Ratuşa binasında ütte.
EvrAzes cıyılışına älege oyışmağa kergän illärneñ häm küzätüçe räweşendä bulğan ike ilneñ wäkilläre kilde. Alar arasında nigezdä finans häm iqtisat yünäleşen alıp baruçı ministrlar. Rusiäne isä iqtisadi üseş häm säwdä ministrı German Gref wäkil itä. Monnan tış, qunaqlar arasında eşmäkärlär, säwdä, finanslar tarmağında eşläwçelär dä kilde. Cıyılışta qabul itüçe yaq – Tatarstan wäkilläre dä qatnaştı. Utırışnıñ başında qunaqlarnı sälämläp, respublika prezidentı Mintimer Şäymiev çığış yasadı. Ul Tatarstannı Könbatış belän Könçığışnı bäyläp toruçı dip äytte. Häm cıyıluçılarnı respublikanıñ berlekkä kergän illär belän xezmättäşlege xaqında söyläde.
Rusiäneñ İqtisadi üseş häm säwdä ministrı German Gref ta Tatarstannıñ Könçığış illäre belän elemtäläreneñ nıqlığın bilgeläp ütte. EvrAzes Şurası utırışınıñ Qazanda uzuın ul Tatarstannıñ näq menä şuşı berlekkä kergän illär belän xezmättäşlege ayıruça äybät buluın äytte. Şulay uq respublikanıñ başqa Rusiä töbäklärenä qarağanda, alğaraq kitkänen iskärtte. Bu xaqta ul jurnalistlarğa Qazannıñ hawa alanına pänceşämbe kiçendä kilep töşkäç söyläde. Äytergä kiräk, Tatarstan belän Rusiä arasındağı wäkälätlärne büleşü turındağı şartnamä qabul itelmäsä dä, respublika iqtisadi yaqtan üzen şaqtıy uñışlı täqdim itä. Soñğı arada Tatarstanda möhim xalıqara çaralarnıñ uzuı da yış küzätelä. Monıñ säbäplären turında respublika premyer-minsitrınıñ tışqı iqtisadı eşlär yärdämçese İskändär Möflixanov menä nindi fikerdä tora.
Tarixi şulay buldı inde, bezneñ respublika ul Rusiäneñ ber töbäge genä tügel. Monda törle sivilizatsiälär, mädäniätlärneñ tatu yäşäwne dä, eşmäkärlek belän şöğellänüneñ ürnägen dä kürep bula. Citmäsä, borınğıdan uq tatarlar bik äybät eşquarlar bularaq ta bilgele. Häm härber şundıy zur çaradan soñ bezneñ danıbız arta ğına bara. Minemçä, keşelärgä Qazanğa kilü bik küñelle. Qunaqlarnı bezneñ qunaqçıllıq ta, eşläw öçen tudırılğan şartlar da, könbatıştan da, könçığıştan da Qazanğa kilü uñaylı buluı qänäğätländerä. Bezneñ eş yaratuçanlığıbız, tırışlığız häm keşelärgä yaxşı şartlar tudıru arqasında qazan dönyadağı iñ aldınğı şähärlär rätenä kerä diärgä bulaÄ Qazandağı utırışta isä berlek illäre arasında Tamojnya berlegen buldıru, atomteş energiäsen qullanu, transport problemaları tikşerelde. Şulay uq Şuranıñ oyıştıru mäs’äläläre dä qaraldı. Anı tağı ber yıl däwamında German Gref citäkliäçäk.
Gölnaz İlgizär
