Azatlıq radiosında xäbär itkänebezçä, 10 nçı aprel' könne Magnitogorski şähärendä ütkän uyın waqıtında “İvan Qazannı aldı, bez dä alırbız!”, “İwan Groznıynı oyatlı itmik”, Kulikov suğışı yılın iskä töşerüçe “1380” sanı yazılğan şiğar'lär kütärelgän ide. Annan da qala, “Sport” federal' telekanaldan alıp barılğan turı kürsätü waqıtında canatarlarnıñ “Tatarlarnı qıyna”, yäğni “Bey tatar” dip qıçqıruları ayırmaçıq işetelep torğan. Tatarstannıñ sport, turizm häm yäşlär eşläre ministrı Marat Bariev imzalağan telegrammada “Tatarstannıñ küpmillätle xalqı şul isäptän urıslar da, tatarlar da bu xällärgä rizasızlıq belderep millätara nizağ çığarırğa tırışu dip bäyäli. Aldağı xokkey uyınnarında mondıy insedentnı buldırmaw öçen aşığıç çaralar kürergä çaqırabız”,- dielä. Mondıy eçtäşlektäge telegrammalar Çiläbe ölkäse citäkçelegenä, Rusiäneñ fizkul'tura häm sport federal' agentlığı başlığı Vyaçeslav Fetisovqa, Rusiäneñ xokkey federatsiäse başlığı Vladislav Tret'yak isemenä cibärelgän.
Tatarstannıñ sport, turizm häm yäşlär eşläre ministrlıysında isä, mondıy xällärneñ bulğanı yuq ide. Sport säyäsättän tış bulırğa tieş. Uyınnar waqıtında tarixqa tayanu uyınnarnı säyäsätläşterä. Ekstremist ideologiäneñ taraluına ğına kiterä, didelär.
Tatarstan prezidentı Mintimer Şäymiev tä, sportnı säyäsätläşterügä qarşı ikänlegen belderep, bu faktlarnı bez iğtibarsız qaldıra almıybız, cämğiätkä bügenge köndä saylawlar bulası yılda şul ğına citmägän ide, dide. Prezident süzlärençä, bäxetkä kürä, tatarstanlılar yağınnan mondıy xällär kürenmi. Bezgä, östen bulırğa kiräk, dide Şäymiev.
Pänceşämbe könne Tatarstannıñ sport turizm häm yäşlär eşläre ministrlığı cibärgän telegrammalarğa cawap bulmadı mikän dip ministrlıqnıñ matbuğat üzägenä şaltıratqan idek. Älegä ber närsä dä kürenmi dip cawap birdelär. Kommersant gazetası xäbär itüençä, “Metallurg” xokkey klubı süzçese Aleksey Mişkov Tatarstanlılarda rizasızlıq tudırğan şiğarlärne ul bötenläy kürmägän ikän.
Belgeçlär äytüençä, soñğı waqıtta Rusiä canatarları utırğan tribunalarda natsi tamğası töşerelgän älämnär yışraq kürenä häm taqmaqlar yışraq işetelä başlağan.
11 aprel'dä, inde mäğlüm bulğança, “Aq bars” “Metallurgnı” 4 / 3 isäbe belän ciñde. Rusiä çempionın açıqlayaçaq soñğı Qazandağı uyında canatarlar üzlären niçek totqannı 13 aprel' kiçe kürsäter.
Nail Alan
