Mart axırında Tübän Novgorod belän Qazannı Rusiäneñ massaküläm mäğlümat çaraları qayber xäbärlärdä gel yänäşä quyıp kildelär, çağıştırdılar. Qazan 2011 yılda uzaçaq universiadağa däğwä qılıp yörgändä, bez Rusiädä öçençe başqala dip äytä. Bu Tübän Novgorodlılarğa bu süzlär oşap betmi, mäxkämägä dä birmäkçelär ide. Qazanlılar Tübän Novgorodlılarnıñ qarşılıqlı süzlärenä artıq iğtibar itmädelär, eş-ğamälläregez belän üzegezneñ dönya külämendä tanılğan ikänlegegezne kürsätegez dip süzne qısqa tottılar. Bu xäbärlärdän soñ ozaq waqıt uzmadı, Qazan yänä Rusiäneñ başqa şähärlärennän ölger bulıp çıqtı. Rusiädä berençelärdän bulıp Tatarstan başqalası merı İlsur Metşin 2000 yıldan birle eşläp kilgän Berläşkän millätlär oyışmasınıñ konsul'tatsiä şurasına saylandı. Bu şurağa şulay uq Parij, Moreal', İstanbul, Vena, Rim, Barselon kebek şähärlärneñ merları kerä. Älege şähär merları, şulay uq İlsur Metşin da BMOnıñ töp särkätibenä cirle xaqimiät, demokratiä üseşe häm başqa mä’sälälärgä qağışılışlı zur, global' qararlar qabul itkändä kiñäşlär birälär. Şuşı könnärdäge utırışları BMO-Xäbitat idaräçelär şurasınıñ 21nçe sessiäse qısalarında Keniäneñ Nayrobi şähärendä uzdı. Bez İlsur Metşinnıñ üze belän elemtägä çığa almasaq ta, Qazan merınıñ xalıqara mäs'älälär buyınça kiñäşçese Rasix Sägıytov belän telefon aşa elemtägä çıqtıq. Ul: “Qazannıñ BMO belän elemtäläre yaxşı bulğanğa, İlsur Metşinnı konsul'tatsiä şurasına saylarğa buldılar” - dide. Ä bu Qazanğa närsä birer ikän soñ?
- Qazan ğadi genä şähär bulıp qalmıyça, dönyaküläm bilgele şähärlär rätenä keräçäk.
Sez Qazan merınıñ xalıqara mäs'älälär buyınça kiñäşçese Rasix Sägıytov fikerlären işettegez. “Tege waqıtta Tübän Novgorod rizasızlıq beldergän kebek bu yulı da Qazannıñ ğına dönyaküläm bilgele şurağa kerüenä Rusiäneñ başqa şähärläre qarşı çıqmadılar mı soñ?”- dip tä sorağan idek bez, Tatarstan başqalası merı kiñäşçesennän. Ul: “Alar inde Qazannıñ üseştäge şähär buluına inana baralar. Şuña, nigä İlsur Metşin saylandı da Peterburg, yäki Rusiäneñ başqa şähäreneñ başlığı saylanmadı digän süzlär bulmadı”- dide.
Röstäm İsxaqi
