Tatarstan cirenä ayaq basu belän Rusiä awıl xucalığı ministrı Aleksey Gordeev anı qarşı alğan Tatarstan türälärenä cılı süzlären audıra başlıy. Respublika söt citeşterü buyınça ildä – ikençe, ikmäk buyınça – öçençe, raps citeşterü buyınça bötenläy aldınğılar rätendä ikän.
Bu süzlärdän soñdırmı Tatarstan awıl xucalığı ministrı Marat Äxmätovnıñ, xökümät başlığı yärdämçese Rawil Moratovnıñ, Rusiä Däwlät Duması deputatı Ayrat Xäyrullinnıñ yözläre balqıp quya. Xäyrullin digännän, irekle jurnalistlar Tatarstan awıl xucalığı ayırım keşelär qulına bülep birelgän dip äytälär, şularnıñ berse Xäyrullinnardır möğayın. Qazan üzägendä “Kol'so” kebek zur kibet açırğa deputat aqçası ğına citmi torğandır ul di, şul uq bäysez qalam iäläre. Rusiä awıl xucalığı ministrı Gordeev 11 may könne Tatarstan prezidentı belän dä oçraşa. Türälär söyläşüeneñ xalıqqa äybät yaqları ğına çığuı räsmi matbuğatnı küzätep baruçılarğa mäğlüm. Oçraşuda äytelgän sannar da şunı kürsätä. Agrar sänäğätne üsterü ilküläm proyekt buyınça da Tatarstan Rusiäneñ aldınğı biş töbäge arasında. Tatarstan türäläre Mäskäw qunağına il küläm proyekt qısalarında respublika 2007елда , 2005 yıl belän çağıştırğanda söt citeşterüen – 4,7 protsentqa, itne – 10,9 protsentqa artırırğa niätlibez dilär. Uzğan yıl näticäläre buyınça da Tatarstannıñ normal' eşlägän xucalıqlarında söt citeşterü küläme – 5,4 protsentqa, itneke – 8,1 protsentqa kütärelgän ikän. Bu räsmi sannar, alar ğädättä yuğarı bula. Tatarstan xalqı bit belä, awıl xucalığı buyınça barsı da alda-göl tügel, buş qırlar, cimerek utarlar, eşsez qalğan ğadi xalıq. Alar xäzer sötne üzlärenä citeşterälär, “Däwlät sötne cıyğanda da tiennärgä cıydı, bezgä ul faydalı tügel şuña da Qazan ğa alıp kilep satabız. Çönki başqaça bulmıy ”-dilär Piträç, Teläçe, Balıq bistäse kebek başqalağa yaqın torğan rayon xalqı. Läkin respublika rayonnarı arasında Mäskäw qunaqlarına kürsäterlek aldınğı awıl xucalığı oyışmaları da yuq tügel. Aleksey Gordeevqa da yaxşı ğına eşläp kilüçe Tuqay rayonındağı “Qama bekonı”, “Çallı Broyler” açıq aksionerlıq cämğiätlärenä ekskursiä oyıştırdılar. “Qama bekonı” duñğızlar ürçetep satsa. “Çallı Broyler” qoşçılıq, qoş ite citeşterü belän şöğellänä ikän. 12 mayda Mäskäw qunağına Qama Tamağındağı rayonnarında uñışlı eşläp kilüçe agrar sänäğät kompleksların kürsätergä cıyınalar. Türälär üzlärençä yörsä xalıq üzençä yäşi birä. Respublikada yazğı qır eşläre bara. “Yaz irtä kilä”-digän farazlar çınğa aşmıy. İgennär çäçelep betmägän, bäräñge utırtılmağan.
Röstäm İsxaqi
