Qazannıñ meñyıllığı aldınnan böten respublikağa tanılğan Raki kafesı bu könnärdä yänä iğtibar üzägendä buldı. Başqalanıñ bäyräme aldınnan sütelgän älege kafenıñ xucaları şähär xakimiätennän yaña urın aldı.
Böten Qazanğa bilgele bulğan Raki sıra barı şähärneñ üzägendä, başqala kirmäne yanında uq urnaşqan ide. Anıñ xucaları - Edel’veys törkeme. Şuşı sıra eçä torğan cirneñ urnaşqan urını, anı yazmışın xäl itte dä inde. Qazannıñ meñyıllığı aldınnan zur ğauğa çıqqan ide Raki tiräsendä. İsegezgä töşeräbez, Şähärneñ iñ üzägendä, Kirmän, Qol Şärif mäçete yanında sıra eçä torğan cir ata-babalarıbıznıñ ruxın kimsetä, şähärneñ yämen cibärä, dip Tatarstannıñ möselman xatın-qızları berlege çıqqan ide. Möslimä gäcite möxärrire Älmirä Ädiätullina älege mäs’älä buyınça xätta respublika prezidentı Mintimer Şäymievqa da möräcäğät itte. Arxitektura belgeçläre dä, Yärminkä mäydanında urnaşqan Raki andağı küreneşne boza, digän fikerdä tordı. Çönki bäyräm aldınnan mäydannı maturlattılar, çistarttılar, andağı böten binalarnı sütep taşladılar, xätta 18 ğasırda tözelgän binanı da qaldırmadılar. Ä Raki sıra barı haman eşläp kilde. Anı meñyıllıqnı bäyräm itärgä ay yarım qala ğına süttelär. Şulay itep, Qazannıñ olı yubileyı uñayınnan töp çaralar uzğan Yärminkä mäydanında sıra eçä torğan urın beterelde.
Läkin anıñ xucaları, ä alar inde äytep kitkänebezçä, Edel’veys törkeme, älege yuğaltu belän kileşmäde. Alar sütelgän sıra barı öçen şähär xakimiätennän kompensatsiä sorap, mäxkämägä möräcäğät itte. Bez şähärneñ telägen ütäp, üzebezneñ milkebezdän baş tarttıq, şuña da xäzer binanıñ häm ul urnaşqan cirneñ bäyäsen kire qaytarunı sorıybız, dip belderdelär alar. Mäxkämädä bu eş inde 2006 yılnıñ noyäberennän birle qaraldı. Anıñ şulay ozaq baruı Raki binasınıñ bäyäsen tögäl bilgeläw belän bäyle ide. Nihayät şuşı könnärdä genä qarar, döresräge ike aranı da qänäğätländergän kileşü qabul itelde. Anıñ nigezendä, Edel’veys törkemenä Raki sıra barı öçen Qazannıñ Üzäk stadionınıñ ber öleşen biräçäklär. Edel’veysqa birelgän öleşneñ mäydanı 4 yarım meñ kvadrat metrnı täşkil itä, dip yazıp çıqtı Kommersant gäcite. Anda üzäk kassalar, ike kafe, xakimiät binası häm bädräflär urnaşqan. Üzäk stadion wäkilläre dä kileşüneñ şartları belän riza buluların belderä.
Şulay itep, Raki sıra barı urınına xäzer Edel’veys törkeme häm anıñ xucalarınıñ berse Ayrat Xäyrullin bädräf belän kafe xucası buldı. Monda inde sıra satarğa mömkin bulmayaçaq. Çönki qanun buyınça sport binalarında sıra satu tıyılğan. Xäyer, Ayrat Xäyrullin moña ällä ni borçılmıydır. Ul üzeneñ sıra biznesın, Qızıl şärıq zavodı aksiälären, inde 2006 yılda uq satqan ide. Bilgele bulğança, ul xäzer awıl xucalığı belän şöğellänä, respublikanıñ berniçä rayonında zur agroxucalıqlar buldırdı. Ayrat Xäyrullin citäklägän Qızıl şärıq-agro şirkäteneñ täcribäsen öyränergä xäzer Tatarstanğa Rusiäneñ törle töbäklärennän kilälär. Xäyer, başqa yünäleştäge eşlär belän dä şöğellänüdän baş tartmıy ul. Edel’veys törkeme menä xäzer Üzäk stadionnı da üz itäçäk. Üzlärenä tieşle cirlärdä alar xucalıq eşlären stadionnıñ idäräse belän bergälektä alıp baruları xaqında belderä.
Gölnaz İlgizär
