20 iyündä, Mäskäwneñ jurnalistlar yortında, internetnıñ «Regionı. ru» säxifäse, fälsäfi fännär doktorı, Rusi fännär akademiäseneñ baş fänni xezmätkäre Täwfik İbrahimnıñ «Na puti koraniçeskoy tolerantnosti» yäğni, «Qor'än tolerantlığına yul alıp» dip atalğan kitabın täqdim itü buldı. Äle genä basılıp çığuına qaramastan küp törle bäxäslär çığarğan, uñay häm tiskäre fikerlärgä duçar bulğan bu kitap belän qızıqsınuçılar bik küp bulğanlıqtan, kitapnı täqdim itügä küp kenä tanılğan ğalimnär kilgän ide. Alardan İslam konferensiäse oyışmasındağı rusiä ilçese Weniamin Popovnı, gäräp häm islam tikşerüläre üzäge direktorı Vitaliy Naumkinnı, Tübän Novgorod ölkäse imamı Umar xäzrät İdrisovnı atarğa bula. Şulay uq Fälsäfä institutı direktorı urınbasarı Andrey Smirnov, Professor Abdulxan Äxtämcan, Mäskäw däwlät universitetı qarşındağı Aziä Afrika illäre institutı direktorı Vladimir Lebedev häm Tatarstan ğalime Aydar Yuziev inde ike kitap avtorı bulğan Yaroslavl' mäçete imamı Röstäm Batıyrov häm başqalar çığış yasadı. Kitap meñ danä näşer itelgän häm anı Tubän Novgorodnıñ Mädinä näşriäte basıp çığarğan. Täwfiq İbrahimnıñ kitabın täqdim itügä Mädinä näşriätendä basılğan başqa kitaplardan torğan kürgäzmä dä eşläde.Häm oçraşuğa kilüçelärgä ul kitaplarnı büläk tä ittelär. Berniçä genä yıl eçendä bu näşriät däwamlı räweştä öç ayğa ber märtäbä «İslam bügenge dönyada» dip atalğan fänni almanax ta çığara ikän. Annan soñ «Möselmannarnıñ tasvirlau icatı» digän kitap, İldäge bilgele mäçetlärneñ fotoräsemnären birep,»Rusiä imperiäse mäçetläre» digän kitap ta “Mädinä” näşriätendä basılğan. Näşriättä çıqqan üz basmaları turında söyläp, näşriät başlığı Damir Möxetdinov, mondıy kitaplarğa qıtlıq, alar az näşer itelälär, bez äle genä Qazanda buldıq, 15 yıl buyı eşläp kilgän Rusiäneñ islam universitetında dini temağa ber genä kitap ta näşer itelmägän dip belderde.
Täwfiq İbrahimovnıñ «Qor'än tolerantlığına yul alıp» digän kitabınıñ kereş süze aldına açıqlama itep, tanılğan islam ğalime Musa Bigievnıñ süzläre kiterelgän. Yagni anda «Mine bu eşkä islamnıñ çın nigezen kürsätü anıñ izge yuğarılığın tasvirlau etärde. Ägär dä minem fikerlärem raslansa,ul islamnıñ tağın ber bizäge bulaçaq, şunıñ belän başqa dinnär arasında islamnıñ böyeklege anıñ qimmäte tağın da üsäçäk» digän Musa Bigeev fikere kiterelgän. Ğomümän, Täwfiq İbrahimnıñ kitabında tatar islam ğalimnäre, Riza Fäxretdin. Şihabetdin Märcäni isemnäre yış telgä alına. Ğalim üze dä,
“ tatar ğalimnäreneñ fänni eşläre, alarnıñ islam turında yazıp qaldırğan äsärläre mine islamğa qaytardı dip belderä. Çönki min, di ul, sönnilär belän şığilar arasındağı üskän, alarnıñ doşmanlığın tatığan, ul talaştan tuyğan keşe, berqayçan da islam belän şöğellänmäm dip uylağan idem. Fälsäfi institutında bergä eşlägän dustım Artur Sägdiev mine Qazanğa alıp qaytıp, şul ğalimnärneñ eşläre belän tanışıu mömkinlege birde. Şunnan soñ min çın küñelem belän islamnı öyränä başladım”,- di Täwfiq İbrahim. Şulay itep, Täwfiq İbrahim ägär dä böten dönyağa tatarlar, rusiä möselman tatarları islamnıñ böyeklegen kürsätmäsälär, anı başqa xalıq kürsätä almayaçaq. Min ul xaqta yazıp ta çıqtım, dide. Bu oçraşuda şulay uq Qazannıñ gumanitar universitet ğalime İlşat Gimadiev ta qatnaşnı häm Täufiq İbrahimnıñ kitabına yuğarı bäya birde. Şulay itep, Mäskäwdä, tanılğan islam belgeçläre, fännär doktorı Täüfiq İbrahimnıñ «Qor`än tolerantlığına yul alıp» digän kitabın täqdim itüdä qatnaştılar. Häm bu kitap çığunı zur waqiğa dip atap, yuğarı bäyä birdelär.
Näzifä Kärimova, Mäskäw
