Tatarstannıñ ömetlären yañartqan töp xäbär 27 iyün könne Mäskäwdän kilde. İTAR-TASS mäğlümät agentlığı xäbär itüençä, respublika belän federal üzäk arasındağı wäkälätlärne büleşü turındağı şartnamä Vladimir Putin tarafınnan yañadan Rusiäneñ Däwlät Dumasına kertelde. Dumanıñ berençe vitse-spikerı Oleg Morozov şartnamä parlamentnıñ yazğı sessiäse tämamlanğançı uq qaralıp, raslanaçaq, dip belderde. İsegezgä töşeräbez, Tatarstan belän Rusiä arasındağı ikençe şartnamäne äzerläw, berençeseneñ mötdäte 2004 yılda çıqqaç başlanğan ide. Ozaq barğan söyläşülär, kileşterülärdän soñ, 2006 yılnıñ közendä şartnamä Tatarstan häm Rusiä prezidentları tarafınnan imzalandı. Vladimir Putin dokumentnı Däwlät Dumasına kertkäç, ul anda bik tiz raslandı. Läkin Rusiäneñ Federatsiä Şurası aldan şartnamäne qarawnı ozaqqa ğına suzıp, axır çiktä fevraldä anı kire qaqtı. Şulay itep, respublika citäkçelege Tatarstan belän Rusiä arasındağı wäkälätlärne büleşü turındağı şartnamäne ğämälgä aşıru öçen ikençe märtäbä köräş başladı.
Gölnaz İlgizär
