Törkiä respublikasınıñ Qazandağı general' konsullığı 1996 yılnıñ sentäberendä açılıp, Qazan sanatoriyе baqçası eçendäge ber binanı biläp tordı. Uzıp kitkän 9 yıl eçendä Törkiä häm Tatarstan arasındağı xezmättäşlek bik küp tapqırlarğa arttı. Xäzer Törkiä Tatarstannıñ säwdä partnerları arasında öçençe urında. Şuşı yılnıñ berençe altı ayı eçendä Törkiä investitsiäläre 12mln. dollar täşkil itä. Mädäni xezmättäşlek tä bermä ber arttı. Xäzer inde Törkiäneñ general' konsullığınıñ eşçänlege tağın da kiñäyä. Uzğan yılnıñ dekaber ayında Ğor'ki häm Möştäri uramnarı kiseşkän urında yäğni näq Derjavin häykäle qarşında konsullıqnıñ üz binasına taş salındı. 9-10 ay eçendä Qazannıñ borınğı yortları stilendä yaña bina tözelep tä bette. Sişämbe, 1 noyäber könne, konsullıq binasınıñ açılışına Tatarstan prezidentı M.Şäymiev, Törkiäneñ toraq xucalığı ministrı Ärgäzän Zäki, Törkiäneñ Rusiädäge ilçese Kurtuluş Taşkent häm başqa räsmi zatlar kilde. Şunda uq elekke yıllarda Qazandağı Törkiä konsulı bulıp eşlägän Äxmät Riza Demerer, İsmail Xaqqı Musa häm 1 oktäberdän eşkä kereşkän yaña konsul Kemal Demircälär dä buldı.
Yaña binanı Törkiäneñ Odak firması tözegän häm bu bina inde arendağa alınmıy, ul Törkiäneñ däwlät milke. Qoyaşlı köz könendä Tatarstan radiosı häm Akterlar yortınnan yıraq bulmağan bu yämle urınğa bik küp zıyalılar, eşquarlar kilde. Respublikanıñ xökümät äğzäläre dä şunda ide. Törkiäneñ Mäskäwdäge ilçese Kurtuluş Taşkent konsullıq töbendäge mitingnı açıp cibärde. Tatarstan prezidentı M.Şäymiev soñğı waqıtta Rusiä häm Törkiä arasında xezmättäşlek häm duslıq mönäsäbätläre bik uñışlı bara, bu eştä Tatarstannıñ da öleşe bik zur dide. Östäwenä tatar häm törki xalıqlarnı ber bersenä yaqınaytu köçeneñ dä barlığı ser tügel. Tatarlarnıñ urtaq mädäniät häm ruxi qärdäşlekkä tartıluı bolay da mäğlüm. Şuña kürä räsmi süzlär protokol buyınça häm nigezdä iqtisadi xezmättäşlek turında äytelsä dä, bu matur yortnıñ açıluı mädäni häm ruxi täräkqıätne kürsätä. Kiçen yaña binada Tatarstannıñ räsmi wäkillären qabul itü mäclese buldı.
Rimzil Wäli
