Biredä Çeçnä premyer ministrı Sergey Abramov maşina qazasına oçrap xastaxanägä salındı. Kiçä kiç Abramov utırğan maşina yök maşinasına bärelgän. Anıñ tän saqçısı belän maşina yörtüçese dä yaralanğan. Abramov totrıqlı awır xäldä dielä. Anıñ böyerenä äyber qadalğan, qabırğaları sınğan. Mäskäw Üzäk Klinik xastaxanäsendä aña operatsiä yasağannar.
Groznıyda Abramovnıñ yardämçese İgor Tarasov jurnalistlarğa "Tabiblar belän fiker alışudan soñ bezneñ isäpläwebezçä ul yıl axırına qädär xastaxanädä qalaçaq häm kiläse yıl başlarında üz wazıyfalarına qaytaçaq" dide.
Çeçnä prezidentı Alu Alxanov bu ğädäti yul qazası bulırğa bik tä oxşağan dip Abramovnı üterergä mataşu mömkinlegen kire qaqtı. Alxanov Rusiä töbäklärenä säfären özep Groznıyğa qayttı. Bu wazıyfağa yılyarım elek bilgelängän Abramovqa 2004-neñ yül ayında bomba höcüme bulıp ul zarar kürmi isän qalğan ide.
