Казан һава аланында тартып барган вакытта очкыч эткеч машинага (толкач) килеп бәрелгән. Бу хакта "Бизнес Online" җиткерә. "Аэрофлот" һава ширкәтенең очкычы SU794 рейсы белән Анталиягә очып китәргә тиеш булган.
Хәзер очыш резервтагы очкыч белән башкарылачак. "Көтеп торган вакытка юлчыларны аэровокзал бинасына урнаштырдылар, аларга Русия Федераль авиация кагыйдәләренә һәм һава ширкәте стандартларына ярашлы хезмәт күрсәтелә. Ризык һәм эчемлекләр бирү оештырылды", дигәннәр басмага Казан һава аланында.
Хәзерге вакытта ни кадәр зарар килүенә бәя бирелә. Урынга Татар транспорт прокуроры һәм тикшерү-оператив төркеме киләчәк. Тикшерү уздырылачак диелә.
- Кичә, 3 июльдә Төркиянең Анталия һава аланында диспетчерлар протест белдереп эшләрен әкренәйтте. Татарстаннан башкарыла торган очышларга да йогынты ясый. Бу юнәлештә көн саен 2-3 очыш башкарыла, бөтенесе дә тоткарлана. Әгәр якын арада мәсьәләне хәл итмәсәләр, тоткарланулар сәгатьләргә түгел, көннәргә сузылачак, ди белгечләр.
- Былтыр җәй Төркия беренче тапкыр русияләр өчен иң кыйммәтле ял итү урыннарының бишлегенә кергән иде. Шулай да русияләр арасында Төркия барыбер популярлык ягыннан беренче урында калды.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
Форум