Болгарда төзелеп килүче кунакханә комплексына бирү өчен биш исем финалга чыкты. Бу хакта 29 октябрьдә матбугат очрашуында хәбәр иттеләр һәм интернет тавыш бирүгә старт бирделәр.
Кунакханә исеме бәйгесен 11 августта игълан иткәннәр иде. Оештыручылар - Татарстан дәүләт туризм комитеты, “Татмедиа” агентлыгы, Спас районы, Корстон кунакханәләр челтәре һәм "Яңарыш" фонды. Бәйге башланганнан бирле теләгән һәркем социаль челтәрләр ярдәмендә үз вариантын тәкъдим итә ала иде. Өч ай дәвамында барлыгы 185 вариант килгән.
Оештыручылар, галимнәр, тарихчылар, археологлар, туризм өлкәсе вәкилләреннән торган сайлау комиссиясе түбәндәге биш исемне финалга чыгарган.
- Кол Гали ( Разил Вәлиев, "Яңарыш" фонды)
- Бөек Болгар ( Айзиля Басариева, Уфа)
- Хан Палас ( Рөстәм хәзрәт Хәйруллин, Казан)
- Кәрван Сарай ( Сөмбел Гаффарова, Казан)
- Алмыш (Ленард Султанов, Перм өлкәсе)
Биш финалисттан җиңүчене халык интернетта 12 ноябрьгә кадәр барачак тавыш бирү ярдәмендә сайлаячак. Тавышны, мәсьәлән, монда, һәм шулай ук Азатлык сәхифәсендә шушы биттә бирергә була.
Җиңүчегә кунакханә төзелеп беткәч анда өч көн тору һәм музей комплексына бушлай керү мөмкинлеге биреләчәк.
