Казан халкы үтә дә кунакчыл. Меңнәрчә җанатарны башкала зарыгып көтә. Кунакханәләрдә ажиотаж. Роспотребнадзор 57 кунакханәне бәяләрен сәбәпсез арттыруда гаепләп җәзага тарткан. Араларында берсе кунак каршы алырга бигрәк "тырышкан". Бер номерга бәясен 300дән артык мәртәбә кыйммәтләндергән. Хуҗадан фатир алып тору да кыйммәткә төшә – бу хезмәткә сорау дистәләгән тапкырга арткан. Кунакларны сыйдыру проблемын хәл итү максатыннан Казан ярминкәсе җирлегендә кемпинг оештырганнар. Көненә якынча 1700 сумнан 150 автойорт сыярлык мәйданчык бүлеп бирелгән. Кунакханә, мотель, хостел гына түгел, хәтта капсул-отель дә ачып җибәрделәр.
Казанда фатирда бер тәүлек яшәү бәясе 4 меңнән алып 15 мең сумга кадәр җитә
Футбол карарга килүче җанатарларга арендага фатир бирүчеләр дә шактый. Җәй көне башка җирдә, мәсәлән, туганнарында яшәп акча эшләп калырга теләүчеләрнең аппетитлары зурдан. Игъланнарга карасаң, фатирда бер тәүлек яшәр өчен бәя 4 меңнән алып 15 мең сумга кадәр җитә. Бәя фатирның зурлыгы, "Казан Арена" стадионына якын яки ерак булуына бәйле. Мәсәлән, Казанның Горький шоссесындагы 6 кеше өчен тәгаенләнгән өч бүлмәле фатирның бер тәүлек бәясе 12 мең сум. "Казан Арена"дан ерак булмаган өч бүлмәле фатир өчен 15 мең сум сорыйлар. Мәскәү базары янындагы бер бүлмәле фатирга урнашам дисәң, 3 мең сум түләргә кирәк.
Кунакханәләрдәге бәяләр дә искитмәле. Күпләрендә инде урыннар юк, үзәктәге ике йолдызлы отельләрдә бүлмә 15 мең сумга кадәр җитә.
БУ ТЕМАГА: Футбол беренчелеге турында 5 факт
Сувенир сатучылар, кафе хуҗалары да өмет итеп кулларын сыпыра: ничек тә табыш алырга ниятли. Форсаттан файдалана белсәң, шөкер, бәрәкәткә булсын! Кунаклар күп булган саен яхшы. Әмма кеше күп булган саен аларның физиологик ихтыяҗлары да бар. Аның хәтле кеше бер урында җыелган җирдә элементар мәсьәлә – йомышны йомышларга махсус кабинкалар җитмәс – болай да шәһәрдә бу сирәк күренеш иде. Әлегә өстәмә матур бәдрәфләр барлыкка килгәне күренмәде. "Зур чара – сүз дә юк, әмма бөтен тирә-якны, ишек алларыбызны пычратып бетермәсләрме", дип курка үзәктә яшәүче әбиләр.
Казан футбол бәйрәменә әзерләнә
Кайбер казанлылар ул көннәрдә өйдән чыкмыйча гына посып утырырга җыена. Уеннар узасы көннәрдә эш көнен кыскарту турында сүзләр дә йөрде. Иң кызык мизгелләрне телевизордан да күреп була, ди гади халык. Күнегүләр үткәргәндә дә шәһәрнең бер читеннән икенче ягына барып җитү – баш бәласе иде. Уен көнендә ничек булыр – күз алдына китерү куркыныч.
Алдан эшләп куйсаң, чемпионатка кадәр түзмәс – тишелер, кырылыр дип курыкканнардыр
Шушы атнада гына ашык-пошык буясы җирләр буялды, юллардагы тишек-тошыклар томаланды. Алдан әзерләнергә өйрәнмәгән бит без. Алдан эшләп куйсаң, чемпионатка кадәр түзмәс – тишелер, кырылыр дип курыкканнардыр мөгаен. Җимерелгән ишегалларын, еллар буена ремонт көткән юллар-тратуарларны исәпкә алучы юк, әлбәттә. Еллар буена көтәләр бит, тагын көтәрләр!
БУ ТЕМАГА: Азатлыкта Җанлы блог
Чемпионат алдыннан тагын бер зур "тырышлык" – Миллениум күпере астындагы популяр граффитиларны буяп кую булды. Күпләр өчен бу – истәлекле урын. Бирегә фотога төшү өчен туристлар, туй кортежлары килеп йөри торган иде, музыкантлар клиплар төшергәне булгалады. Биредә атаклы графистларның хезмәтләре дә булган. Шәһәр рәссамнарына биредә картинаң ясалган булу – горурлык өчен сәбәп иде. Мэриянең матбугат хезмәтендә графиттиларны юк итүне диварларда ямьсез сүгенү сүзләре булуы белән аңлаттылар. Янә үз иҗатларын биредә мәңгеләштерергә теләүчеләр махсус рөхсәт алырга тиеш булачак.
Күңелле яңалыклардан: тимер юл вокзалы белән елга порты арасында туристик трамвай юлы ачылды. Түбәсенә түбәтәй беркетелгән борынгы вагонда юлдагы 40 минутта милли музыка, тәм-том белән хозурлынырга, җиде телдә аудиогид тыңларга мөмкин. Әлегә ул пәнҗешәмбе, җомга, ял көннәрендә хезмәт күрсәтәчәк. Уеннар вакытында вакыты үзгәрергә мөмкин.
Халыкара футбол федерациясе җитәкчесе Джанни Инфантино: "Дөнья беренчелеге вакытында дискриминация, яисә иминлек өчен борчылабыз дип әйтмим, әмма бу мәсьәләгә бик җитди карыйбыз", диде. Кайбер иминлек чаралары турында Азатлык та язган иде.
Универсиада алдыннан да төрле фикерләр булды, әмма аның шәһәр, аның халкына тәэсире булмады түгел, булды. Чемпионаттан соң нинди нәтиҗәләр ясарга булыр – карарбыз.
