Прагада яшәүче татар журналисты Фәридә Корбангалиеваның әти-әнисенең фатирына тикшерүчеләр килгән. Алар Казанда яши, икесе дә өлкән яшьтә. Куәт оешмалары вәкилләре кызлары турында сорашкан. Бу хакта ул үзенең Facebook битендә язган.
"Минем Казанда яшәүче әти-әнием фатирына тикшерүчеләр килгән. Кыскача әйткәндә, минем турында сорашканнар. Имеш, ничек инде мин экстрадициягә кадәр җитәрлек җинаятьчегә әверелегәнмен, ничек шулкадәр түбән тәгәрәгәнмен. Сөйләшү шундыйрак булган. Иң кызыгы карт әти белән әниемнән аерым-аерым сорау алганнар. Аерым бүлмәләргә керткәннәр. Күрәсең, ахырда икесе дә ялганламаганнармы икән дип тырышканнардыр, кызлары, чыннан да, экстремист икәнен танысыннар өчендер.
Әти дә, әни дә үзләрен лаеклы тоткан, гәрчә аларны бу хәл борчыган, әлбәттә. Әтием тикшеренүчеләргә нацизм хакында лекция дә укып өлгергән, ә әнием Украинадагы сугышка кагылышлы сорауга тоткан да "Ә кем беренче һөҗүм итте?" дип сорау биргән.
Өйгә килеп керүчеләр үзләрен итәгатьле тоткан, фатирны астын өскә китермәгән. Шуңа да рәхмәт", дигән ул.
Күптән түгел Русия Чехия хакимиятеннән журналист Фәридә Корбангалиеваны экстрадицияләүне таләп итте. Шундый эчтәлекле хат Чехия полициясенә килгән, ә полиция аны журналистка тапшырган.
Фәридә Корбангалиева аны Чехия мәхкәмәсендә бушлай якларга адвокат табылганы турында хәбәр итте, ә Русиядә аның хокукларын яклар өчен хокук яклаучы Павел Чиковның такымыннан адвокатлар эшкә тотыначак, диде ул.
- Фәридә Корбангалиева Казанда туган. Ул башта Татарстан телевидениесендә эшләде, аннары 2007 елда Мәскәүгә китте, "Россия 1" каналында "Вести" тапшыруын алып барды. Ул режиссер Денис Красильников белән бергә "Билгесез сугышның билгесез каһарманнары" дигән документаль фильм төшерде. Бу фильм Беренче Дөнья сугышында татарларның тарихын бәян итә.
- 2014 елда Кырым аннексиясеннән соң Фәридә Корбангалиева "Россия" каналында эшен туктатты һәм гаиләсе белән Чехиягә күченеп китте. 2018-2021 елларда "Настоящее время" каналында эшләде.
- Хәзерге вакытта үзенең YouTube каналын алып бара, төрле кешеләр белән интервьюлар ясый. Ул Русиянең колонияль сәясәт алып баруы турында да күп сөйли, бу хакта әңгәмәдәшләре белән дә фикер алыша. Соңгы чыгарылышларында Украина журналисты Виталий Портников, Украина ягында сугышучы татар Сәид Исмәгыйлев белән әңгәмәләрен карарга мөмкин.
- Июль аенда Азатлык Радиосында журналист белән әңгәмә чыкты. "Русия хакимияте урыс булмаган халыкларны юкка чыгару сәясәтен алып бара", дип сөйләгән иде Корбангалиева.
🛑 Русиядә Азатлык Радиосы сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
Форум