Betmäs – tökänmäs bäyräm yalları haman da däwam itä. Häm menä şundıy waqıtta qunaqta bulıp qaytırğa, yäisä qunaq çaqırırğa, konsert, teatr - kinolarğa barırğa, çırşı tiräsenä çığıp kerergä menä digän forsat tua. Bıyıl Qazanda başqa yıllardan ayırmalı bularaq ike üzäk çırşı açıldı. Qazan milli – mädäni üzäge qarşındağı Soltan Galiev mäydanında boz şähärçege, çırşı da yuq. Ä menä Qazannıñ 1000 yıllıq parkında häm Qol Şärif mäçete, Üzäk stadion yanındağı Yärminkä mäydanında mähabät ağaçlar bizälgän. Qazanda barlığı 103 çırşı şähärçege eşli. Zamanında provoslav bäyräm bilgese bulğan çırşı ağaçı qışnı häm tabiğät'ne yaratqan bala – çağanıñ yaratqan uyınçığına äylände. Anıñ dini mäğnäsen berkem dä belmi.
Teatrlarğa kilgändä, bu atnada G. Qamal isemendäge akademiä teatrında “Qıyu qızlar”, “Qazan Sölgese”, “Qara çikmän” spektakl'läre uynala. Şulay uq, Qamal teatrında 15 ğinwar'da Azat Tişerşäix konsertı bulsa, 20 könne “Cırlıyq äle” televizion tapşırunıñ yubiley konsertı belän dä xozurlana alasız. Tinçurin teatrında bu könnärdä komediälär genä kürsäteläçäk. Äytik, “Bala balası baldan tatlı”, “Gölşayan”, “Ğayfi babay öylän davay”, “Parij yegete Älfänis”.
Balalar öçen “Äkiät” qurçaq teatrında, ike atnalıq Yaña yıl tamaşalarına kerü biletları inde satılıp betkän inde. Spektakal'lärneñ barısı da rus telendä. Repertuarda 8 tatar qurçaq spektakle bulsa da 400 meñ yäşägän Qazanda tatarça qurçaq tamaşaçılarına bilet aluçı bik az. Teatr xezmätkärläre bu biletlarnı rusça teatrlarğa östämä itep satalar. Şulay da üz balalarına häm onıqlarına tuğan telebezdä äkiät kürsätergä teläwçe milli ruxlı Qazanlılar da bar. Alar öçen 4 fevral'dä “Qamır bartır” spektakle kürsäteläçäk. Bu teatr bik zur üzgäreşlär kötep yäşi, tizdän şähär üzägendäge matur urında yaña binağa nigez salınaçaq. Nekrasov uramınıñ asqı öleşendä, M. Vaxitov häykäle qarşındağı caylı urındağı mäydan, qayber qarşılıqlar buluğa qaramastan qurçaq teatrına biräläçäk. Monı Qazan şähäre xakimiätendäge üzgäreşlär belän añlatalar.
Şulay uq qayber mädäniät yortlarında, muzeylarda tatarça ütkän çaralarda qatnaşırğa mömkin. Ämma andıy milli kiçälär turında reklam bik az. Qazanlılar Qorban bäyrämenä bağışlanğan mädäni çaralar bulmasmı dip özgälänälär. Xäzergä Sukon bistäse metro stansiäse yanındağı “Tuğan awılım” restoranlı küñel açu kompleksı ğına xäläl şaşlıqlar häm maxsus programma täqdim itä. Milli, mädäni çaralarnıñ sülpän ütüe mäğlümat citmäw, reklam zäğiflege belän añlatılğaç, “Azatlıq” radiosı bu mäğlümat buşlığın tutıruğa yärdäm itä. Xäyer, köne – töne kinoteatr ekrannarınnan mawıqtırğıç häm şomlı manzaralar kürsätkän “Dnevnoy dozor” kinofil'mı reklamı belän berkemdä köndäşlek itä almıy. Ber yulı barlıq kinoteatrlarda barğan bu kinoğa biletlar tabu bik qıyın. Barı tik tön urtasında başlanğan seanslarğa ğına bilet alıp bula. Ä xalıq bigräk tä yäşlär böten dönyasın onıtıp, fähemle, tärbiäwi, mädäni tamaşalarğa tügel, ä nevalarnı qıtıqlıy torğan, köç qullanuğa häm äcäl çağılğan kinonı östen kürä. Älbättä, mondıy ata – analarnıñ balaları da qurçaq teatrında “Qamır batırnı” tügel, ä berär “Ğarri Potternı” kürergä tırışaçaq. Şulay da Aydar Fäyzraxmanov, Azat Timerşäix, Liliä Mullağaliewa kebek tatar estrada artistları küpmeder tamaşaçını üzlärenä qaratırğa tırışaçaq. Ğinwar axırında Qazan sirkında “Bertuğan Grimnar”, Piramidada fevral' ayında Mixail Jevanetskiy, “Çay vdoem”, mart başında Kristina Orboqayte çığış yasağanda zallar buş bulmas dilär. Çönki alarnıñ da uñışlarınıñ serläre şul uq reklam, televidenie, yäğni şul uq “Dnevnoy dozor” fenomenı. Kiläse çärşämbe könne eçke eşlär ministrlığınıñ mädäniät üzägendä çığışı belän tatar bulıp ta, zamança rus sänğät'käre bulıp kitkän Yuliä Cihanşina kompozitor Vitaliy Xarisovnıñ cırların başqaraçaq.
Gölnaz Şäyxetdin
