Perm ölkäsendä 200 meñgä yaqın tatar yäşi. Ämma Perm ölkäsennän Qazanğa küçep kilep yäşägän tatarlar da bixisap. Alar arasında kompozitor Mäsğüt İmaşev, rejisser Räşit Zahidullin häm cırçılar Sänifä Ranğulova, Güzäl Urazova häm inde tağın başqa bik küp millättäşlär yäşi. Ä annan bulğan millättäşlärne Qazanda “Perm tatarları” yaqtaşlıq klubı tuplap tora. Alar tuğan yaqları belän härçaq elemtädä toralar. Häm Perm tatarları Qazanda bik dus yäşilär . Alar Därwiş bistäsendä yıl sayın 9 mayda “Sabantuy” bäyräme uzdıralar. Bu bäyrämgä bağışlap yazılğan “Barda tübätäye” dip isemlängän cırnıñ süzlären Räşit Yağfarov yazğan.
Bu cämğiätneñ citäkçese ğalim häm cämäğät eşleklese Räşit Yağfarov bezneñ studiädä. Anıñ belän yaqınraq tanışıyq äle.
Räşit Yağfarov 1946 yılnıñ 6 fevralendä Perm ölkäse Barda rayonınıñ Küçtänti Baş awılında altı balalı ğailädä tuğan. Barda rayonınıñ mäktäplärendä uqıp alarnı tämamlağannan soñ, Osa pedagogiä uçilişçesında uqığaç, KDU tatar tele häm ädäbiät bülegen, häm Qazan teatr studiäsen tämamlağan.Tuğan yağında radiojurnalist, rayon gazetası xäbärçese, uqıtuçı, bulıp eşlägän . Aspiranturada belemen arttıra. 1977 yılda “Tatar balalar fol'klorınıñ poetik janrları” digän temağa kandidatlıq dissertatsiäse yaqlıy.
Xäzer ul Tatarstan Fännär akademiäseneñ Ğ.İbrahimov isemendäge Tel, ädäbiät häm sänğät institutınıñ ölkän fänni xezmätkäre. Töp fänni yünäleştä nindi fikerlär belän yanıp yörüe turında ul menä närsälär dide:
“Tel ädäbiät häm sänğät institutınıñ fol'klor bülege elek 13 tomlıq çığarğan ide , xäzer 25 tomlığın äzerlibez ”dide ul.
Häm üzeneñ “Qayt, sin, bezgä Söyembikä!”dip isemlängän şiğeren uqıdı.
Ä menä “Barda tübätäye” dip atalğan anıñ süzlärenä anıñ yaqtaşı kürenekle kompozitor Mäsgüt İmaşev yazğan köy belän Asaf Väliev başqaruında yañğırağan cır bik populyar bulıp kitä.
Räşit äfände , yäş buın millättäşlärebezneñ, yäğni üzeneñ ulı İldar Yağfarov belän “Quqtaw” kinofil'mın töşerüneñ tarixın söyläde.
Qazandağı Perm tatarları yaqtaşlığı turında Räşit Yağfarov bolay dide:
“Perm'gä qaytırğa cıyınabız. 1751 yıldağı baş kütärülär belän citäkçelek itkän Batırşa turında yaqtaşıbız tarix fännäre kandidatı Fäyzelxaq İslaev kitap çığarğan ide. Menä fevral' azaqlarında Batırşağa bağışlanğan konferensiä ütkärergä cıyınabız. Tağın Perm ölkäsendä mart ayında tatar ädäbiätı häm sänğate könnären uzdırırğa Tatarstan häm Perm arasında äzerleklär alıp barıla” dide ul
Sez Perm tatarlarınıñ Qazandağı cämğiäte turında tapşıru tıñladığız. Tapşıruda cämğiätneñ citäkçese, ğalim häm cämäğät eşleklese Räşit Yağfarov qatnaştı.
Mälikä Basıyr, Qazan.
