“Tatarstan meditsina- sotsial' ekspertiza baş byurosı” oyışmasınıñ yıllıq utırışına Mäskäwdän, respublika Xökümätennän, Tatarstan däwlät Şurasınnan da wäkillär qatnaştı. Oyışmanıñ citäkçese Xäydär İksanov uzğan yıl eşçänlegenä näticä yasap, olı buın belän berrättän balalar arasında da invalidlıyqqa çığuçılar artuın äytte. Şähär belän awıllar arasında invalidlıyqqa çığuçılarnıñ san ayırmasına tuqtaldı. Yöräk, yaman şeş awıruları näticäsendä invalidlıyqqa çığuçılarnıñ sanı kübäyuen bilgeläp uzdı.
İnvalidlıyqqa çığarğa tezläwçelär sanınıñ soñğı yılda artuı küptän tügel qabul itelgän qanun belän dä bäyle ikän. “Tatarstan meditsina- sotsial' ekspertiza baş byurosı” federal' däwlät oyışması citäkçese Xäydär İxsanov bolay dide
Yaña 122 qanun qabul itelgäç federal' däräcädäge aqçalata tüläwlär alırğa teläweçlär kübäyde. Ayıruça awıl cirendä.
Yıllar buyı xezmät xaqı kürmägän awıl xalqınıñ invalidlıq alıp bulsa da äzme-küpme aqçalı bulırğa teläwe turında äledän-äle söylänep kilä. Şuña fermada barmaq sındırıp, ayaq-qulların awırttırıp invalidlıq sorap kilüçelär dä arta bar ikän. Ämma invalidlıq bilgesen alu bügenge köndä şaqtıy qatlawlı bulıp qala. Anı yıllar buyı yörep tä ala almawçılar şaqtıy. Läkin yıllıq cıyılışta äytelgänçä, bıyıl möräcäğät itkän xalıqnıñ 90 protsentqa yaqını invalidlıq alğan. Ämma şuşı könnärdä genä yaña qarar qabul itelgän. Anıñ buyınça invalidlıq alırğa tezläwçelärgä taläplär arta ikän. Bu mäs’äläne yıllıq utırışta bik quzğatmasqa tırıştılar. Xäydär İksanov
Kiçä genä yaña dokument aldıq, anda şaqtıy normalar üzgärtelgän. Berençe çığarğan qarar belän qänäğät bulmasa, invalid yaña sostavqa ber ay ğına möräcäğät itä ala.
İnvalidlıq alu yäki anı qabat ozınaytu öçen şaqtıy ğına käğäzlär tutırırğa kiräk. Tikşerülärneñ dä barısı da tüläwle häm şaqtıy qimmätkä töşä. “Tatarstan meditsina- sotsial' ekspertiza baş byurosı respublikanıñ Sälämätlek saqlaw ministrlığı belän individual' reabilitatsiäläü programmasın tutırğanda anı kiläçäktä ğadiläşterüne küzdä tota ikän. Xäydär İxsanov
Yañalıqlar küp bulaçaq. Awırular tikşerüneñ sıyfatın arttırunı niätlibez, yaña dokumentlar äzerlibez. İndividual' reabilitatsiäläü programmasın kübräk invalidlarğa birergä telibez. Çönki küp çaralar şul programma nigezendä eşlänä.
Landış Xarrasova
