Ğali mäcles tartqalaşlar belän başlandı. Eş şunda, ber törkem kommunist, firka bülekçäse idäräsen inqär itep, Ğali mäcles uzdırğan ide. Anda firqäneñ başı Renat Galiev urınına Vladimir Nesterov saylandı. Läkin Üzäk komitet anı legitim tügel dip taptı. Şulay buluğa qaramastan, fetnäçelär 11 mart uzğan cıyında da firqäne qulğa töşermäkçe buldılar. Çarağa kilgän Üzäk idärä wäkile Valentın Romanovnıñ mäclesne alıp barunı üz qulına alğaç qına tartqalaşlar basıldı. Nesterov yaqlı törkem — ike distägä yaqın keşe çaradan çığıp kitte. Şulay buluğa qaramastan, kvorum saqlandı häm utırış däwam itte.
Anda töp çığışnı berençe särkätip Renat Galiev yasadı. Ul “Başqortstan Prezidentı xakimiäte respublika kommunistları firqäsen üz qulına alu öçen bar pıçraqlıqqa bara. Xakimiät wäkilläre rayonnan-rayonğa yörep kommunistlarnı eşkärtep, qotqığa birelmägännären qurqıtıp yöri“, dide.
Çara axırında qarar qabul itelde. Anda 20 may qorıltay uzdırırğa, Vladimir Nesterovnı firqädän çığarırğa, tağı berniçä kommunistnıñ firqädä qalu-qalmawın urınnardağı büleklärdä qararğa dielgän.
Mönir Wafin, Ufa
