“ Näwrüz” –ul törki xalıqlarnıñ bik borınğı zamannardan uq yaz könendä ütkärelä torğan bäyräm. Ul - yaz könendä Yaña yılnı qarşı alu bäyräme. Bu bäyrämne ğädättä, kön belän tön täñgälläşkändä, yäğni 22 marttan başlap, ber atna çaması waqıtında uzdıralar. Soñğı 15 yılda Tatarstanda bu bäyrämne “Xalıqara duslıq yortı”, yäğni anda urnaşqan üzbäk , azerbaycan tatar, başqort xalıqlarınıñ milli- mädäni oyışmaları uzdırdılar.
Ä menä bıyıl Näwrüz bäyrämen ğädättägedän irtäräk, Tatarstan däwlät sänğät muzeyı başlap cibärde. Häm Näwrüzgä bağışlanğan “Şärıq bizäkläre” kürgäzmäse comğa könne ük açıldı.
Muzey xezmätkärläre bäyrämgä xalıqnı cälep itär öçen bäyräm programmasın yazıp törle uqu yortlarında uqığan studentlarğa, qazanlıqlılarğa taratıp yörgännär. Bäyräm muzey eçendä genä tügel , ul inde muzey ixatasında da däwam itte.
Näwrüz qunaqların zurnayda uynağan muzıkantlar, milli kiemnär kiep biegän qızlar qarşı aldı. I Xalıqara “Cide yoldız” festivalenä Üzbäkstannan kilgän danlıqlı “Yalla” vokal- muzıka qoralları ansamble sänğät'kärläre “Şärıq bizäkläre” kürgäzmäseneñ zur qunaqları buldı.
“ Şärıq bizäkläre” kürgäzmäsendä urnaştırılğan üzençälekle, matur milli kiemnärne kiep qarap, häm Röstäm Usmanov yasağan sawıt-sabanı satıp alırğa da mömkinçelek bar ide. Häm bäyrämgä kilgän xalıq, şul keräç sawıtlarğa salınğan çäylär eçep, östäldäge tämle rizıqlar belän sıylanıp, üzbäk biyüllären qarap häm könçığış köylärenä quşılıp biep, küñel açtılar.
Bäyräm tämamlanğanda, mäcüsilektän qalğan ğädät buyınça, şämnär yandırıp, ağaçqa tasma bäyläp, teläk telädelär.
Näwrüz bäyräme bıyıl menä şulay başlanıp kitte. Ä 21 martta Qazannıñ Ğ.Tuqay uramında urnaşqan “Melita” mädäni yortında Näwrüz bäyräme äle däwam itäçäk.
Mälikä Basıyr, Qazan.
