“Yäşlär säxnäse” bäygesendä kürsätelgän spektakl'lärneñ küpçelege armiä, eçkeçelek, awır tormış şartları turında buldı. Ostalıqları buyınça qayber professional' teatrlarnı da uzdırdı yäşlär. Bäyge ikençe tapqır ğına uza. Bıyıl anda barlığı 6 teatr studiäläre qatnaştı. Mäskäwdäge “Ğaziz” teatrınnan tış, qalğannarı Tatarstandağı yuğarı häm maxsus uqu yortları qarşında oyışqan teatrlar ide. Bäygedä başta 10 teatr studyase qatnaşırğa teläk beldergän. Tubıl häm İvanovo şähärlärennän yäş millättäşlärebez kilä almağan.
Ciñüçelärne törle nominatsiälär buyınça qotladılar. “İñ yaxşı spektakl'” dip Qazan däwlät awıl xucalığı akademiäseneñ xalıq teatrınıñ “Bez qaytırbız, änkäyem” spektakle bilgelände. “Ömet” nominatsiäsendä Mäskäw tatar milli-mädäni moxtäriäte qarşındağı “Ğaziz” teatrı ciñde. Anıñ citäkçese Tänzilä Xösnetdinova bolay dip tanıştırdı
Bezneñ teatr äle uzğan yıl ğına oyıştı. 1933 yılğa qädär Ässadullaev yortında “Eşçe” teatrı eşläp kilgän. Menä 70 yıldan soñ qabat teatr oyıştı.“Tamaşaçı mäxäbbäte”nä Tatar däwlät gumanitar-pedagogiqa universitetınıñ “Mizgel” teatrınnan İlfat Äxmädullin layıq buldı. “Xatın-qız rolen iñ yaxşı başqaruçı” itep öç qız arasınnan Qazan däwlät universitetınıñ “Acağan” teatr studiäsennän Läysän Töxvätullina, “İr-yeget rolen iñ yaxşı başqaruçı” bulıp Tatar däwlät gumanitar-pedagogiqa universitetınıñ “Mizgel” teatrınnan İlnaz Bahaviev ciñde. Monnan tış “İñ osta rejisser” bilgelände. Bu isemne Arça pedagogika kölläteneñ “Altınçäç” teatr tügärägennän Fakiä Şäyxullina aldı. Gran-priğa Qazan däwlät universitetınıñ “Acağan” teatr studiäse citäkçese Rail Ömetbaev layıq buldı.
Yabılu tantanası çın bäyrämgä äwerelde. Häm ul büläklär tapşıru spektakl'lärdän özeklär kürsätü häm cır belän ürelep bardı
Landış Xarrasova
