Mart ayında Qazanda, menä inde tuğız yıl buyı, Tatarstan muzıkantlarınıñ bik yaratıp, teläp qatnaşa torğan ber bäygese uza. Bıyıl ul 21 mart könne Salix Säydaşev isemendäge Zur konsertlar zalınıñ Kamera muzıkası zalında başlanıp kitte. Ul “Röstäm Latıypovnıñ tuğızınçı bäygese” dip atala. Bu bäyge respublikanıñ mädäniät ministrlığı bulışlığında ütä.
Älege çara kompozitor İogann Sebast'yan Baxnıñ tuğan könenä bağışlanıp ütkärelä, häm bu bäygedä anıñ äsärläre uynala.
Anıñ nigez saluçısı , matdi yaqtan oyıştıruçısı- eşmäkär Röstäm Latıypov.
Klassik muzıkağa ğaşıyq Latıypovlar ğailäseneñ ğädätläre turında Röstäm Latıypovnıñ tormış iptäşe Raziä xanım Yenikeeva söyli:
Klassik muzıkanı yaratuçı bu eşmäkärneñ ätise kürenekle tatar kompozitorı Mäsgüt Latıypov. Röstäm Latıypovnıñ babası üz zamanında, Qazaxstanda tatar mäktäbe açtırğan keşe , ä ätise komprozitor häm dirijer Mäsğüt Latıypov suğış waqıtında talantlı yätim balalarnı cıyıp orkestr oyıştırğan bulğan. Keşelärgä yärdämçellek xas bulğan ğailädä üskän Röstäm Latıypov üze dä bu ğädätne däwam itä. Bäyge 25 martqa qädär däwam itäçäk. Anda Tatarstannıñ muzıka mäktäplärennän, uçilişçelarınnan, häm Qazan Konservatoriäse qarşındağı maxsus urta muzıka mäktäbennän balalar İ.S.Baxnıñ äsärläre belän, berrättän Mäsğüt Latıypovnıñ äsärlären dä başqaralar. Muzıkant balalar bu köylärne törle muzıka qorallarında: pianinoda , skripkada, al't häm violonçel'dä uynıylar.
Bügenge köndä muzıka belän şöğellängän balalar öçen bu bäygeneñ oyıştırıluı da, anıñ büläkläw fondınıñ küläme 15000$ amerikan dollar buluı da, anı başqa bäygelärdän ayırıp tora. Bäygedä ciñüçelärne aqçalata büläklär kötä. Berençe urınnı yaulawçığa - 3000$; ikençe urınğa-2000 $, öçençe urınğa-1000$ bilgelängän. Bäygedä qatnaşqan ber bala da büläksez qalmayaçaq,- di Raziä Yenikeeva.
Bıyıl da bäygedä qatnaşırğa teläk beldergän muzıkant balalar respublikanıñ törle şähärlärennän: Älmät , Bögelmä , Çallı ,Tübän Qamadan kilgännär. Alar arasında Qazan maxsus muzıka mäktäbendä uqığan
qıtay millätennän bulğan Kim Bo Xyun da bar.
Bäygedä ciñüçelärne bik märtäbäle jyuri bilgeli. Fortepianoda uynawçılarnı bilgeläwçe jyuri räise professor Rubin Abdullin, skripkada uynawçılarnı bilgeläwdä jyuri räise RF xalıq artistçası, professor Zarius Şixmurzayıva.
Balalarnı büläkläw tantanası 25 martta ütäçäk. 17 ğasırnıñ ataqlı kompozitorı nemes millätennän bulğan İogann Sebast'yan Bax muzıkası belän 20 ğasırnıñ muzıkantı tatar kompozitorı Mäsğüt Latıypovnıñ muzıkasın yaratıp başqarğan balalar yıldan-yıl kübäyä bara. Bäygeneñ qotlaw tantanasına, ciñüçelärgä qimmätle aqçalata büläklär tapşırırğa, konkursnıñ iğänäçese Röstäm Latıypov üze dä kiläçäk.
Mälikä Basıyr, Qazan.
