2 aprel' yäkşämbe könne Piramida küñel açu kompleksında kompozitor Radik Salımovnıñ icat konsertı Tatarstan kompozitorlar berlege, Qazan şähäre xakimiäte yärdämendä häm Radik Salımovnıñ bik küp dusları belän bergä oyıştırılğan ide.
Kem soñ ul Radik Salımov? Kompozitorlar berlegeneñ cawaplı särkätibe Rämziä Useinova bezgä menä närsälär äytte:
“Radik Salimov ul bügenge köndä iñ talantlı, häm iñ yäş kompozitorlarnıñ berse.Ul eşlägän yünäleştä annan başqa älegä ber kompozitor da eşlämi. Ul - elektron muzıkanı, fol'klor muzıkasın, häm xalıq muzıkasın, şulay uq inde küptän yazılğan kompozitorlarnıñ muzıkaların zaman taläplärenä yaraqlaştırıp, professionallarça eşkärtä. Anıñ muzıkası yevropa- aziä häm dön'yaküläm taläplärenä dä turı kilä. Häm anıñ üzeneñ belemen mäxäbbäten tuğan tele moñına , anıñ tirän tamırlarına yünältüe, bu anıñ muzıkasınıñ iñ zur ähämiäte”, – dide Rämziä Useinova.
Bu konsertta başqarılğan barlıq çığışlar da Radik Salımov aranjirovkasında, zamança başqarıldı da :
Sankt- Peterburgtan qunaqqa kilgän, böten dönyağa tanılğan cırçı Al'bert Asadullinnıñ Salix Säydaşevnıñ “Xuş awılım”isemle cırı da , “Aq qalfaq” isemle balalar fol'klor kollektivı çığışı da , Nail' İbrahimovnıñ “Şähärgä yul” biyü törkeme çığışları da, “ Qara urman”nı başqarğan Mäslix tä, “Disbe” cırın başqarğan Närkäs tä , Mäskäwdän kilgän artistlarnıñ häm tağın da bik küp yäşlärneñ çığışı da anıñ muzıkasınıñ bik populyar buluın rasladı. Mädäniät , sänğät ölkäsendä xäräkät itkän yäş muzıkantlarnıñ dönyağa , yañaça , üzlärençä fälsäfä yörtüläre, bu alarnıñ tormışqa üzlärençä qaraşları , yäki al’ternativ räweştä fiker yörtüläre kürende.
Piramidağa kilgän tamaşaçılarda Rusiädä häm çit illärdä taralıp kilüçe elektron muzıka tatarlarğa da yat tügel, - digän tä'sir qaldı.
Mälikä Basıyr , Qazan.
