Räşit Yağfarovnıñ 60 yäşlek yubiley kiçäsen, alıp barğan Rabit Batulla berençe süzne Räşit Yağfarovnıñ fikerdäşe bilgele ğalim, İldus Ämirxanovqa birde. Tatar xalqınıñ törle çorlardağı tarixi batırları surätlängän, ĞüKamal teatr artistları uynawında, teatral'läşterelep kürsätelgän küreneş, bu kiçägä nindider ber kütärenke rux ta östäp cibärde.
Räşit Yağfarov üze turında süz başlağanda “ bu kiçäne millätebezneñ yazmışı turında söyläşep alıp barsaq, min bik şat bulır idem” dip äytte.
TR mädäniät ministrı urınbasarı Ayrat Cabbarov aña TR mädäniättäge qazanışları öçen kükräk bilgesen häm Qazannıñ 1000 yıllıq istälegenä çığarğan medal'ne tapşırdı.
Tatarstan Yazuçılar berlege idärä räise urınbasarı Älfät Zakircanov, üzeneñ qotlaw süzendä “Anıñ “Käcä -mäkärcä”, “ Tulparlarım”, “General ätäç” kebek şiğri cıyentıqların mäktäplärdä balalar kötep ala, anıñ şiğerläre ixlastan balalarğa xezmät itä, dip äytte.
Tatarstannıñ Tel, ädäbiät häm sänğät institutı isemennän yubilyarnı ğalimnär İlbaris Nadirov belän Flora Äxmätova qotladılar. Näqi İsänbät başlağan eşneñ däwamçısı bularaq tanılğan Räşit Yağfarovnıñ fol'klor ölkäsendäge ğilmi eşçänlegen bez berençe urınğa quyar idek, dip söylädelär alar.
Şağirlär Zinnur Mansurov, Xarras Äyup, Ğazinur Morat Räşit Yağfarovqa bağışlap yazğan şiğerlären uqıdılar.
“Küp yıllar millät öçen eşlisez”,- dip Räşit Yağfarovqa Kamal teatrı citäkçeläre teatrnıñ 100 yıllığına çığarılğan istälekle altın medale belän büläklädelär.
BTK BK räise Rinat Zakirov “Däwlätçelegebezneñ yaña etabında xalqıbız öçen eşlägän xezmätläregez, xalıq xörmäteneñ kürkäm ber çağılışı bulsın ” dip aña kongressnıñ iñ yuğarı bülägen tapşırdı.
Şulay itep, Räşit Yağfarovqa yubiley kiçäsendä beryulı 3 medal' häm ber kükräk bilgese tapşırıldı.
Tağın da , TR Fännär akademiäseneñ citäkçese Äxmät Mazgarov isemennän, TDGPU citäkçese Cämil Niğmatov isemennän täbrik xatları da tapşırıldı. Şulay uq, BTİÜ isemennän Tälğat Barievneñ , Böten tatar “Mäğärif” häm “Xalıqlar duslığı” oyışmasınnan, Üzebez” dip isemlängän yaña buın xäräkätennän dä qotlawlar yañğıradı.
Milli xäräkätneñ kürenekle ädibäse Älmira Ädiätullina “Qaya barmıy , nilär kürmi, İr-yegetkäy belän at başı”,- dip cırlap cibärep, aña Körän büläk itte.
Räşit Yagfarovnıñ yaqtaşları yubilyarğa Hidiät Aşirovnıñ “Närsä soñ töp şöğeleñ ?”dip yazğan şiğeren, Perm ölkäse xakimiäteneñ Räxmät xatın, häm tağın da bik küp büläklär tapşırdılar.
Konsert programmasında çığış yasawçılar da bik mul buldı:
Gennadi Makarov citäkçelegendäge “Aq qalfaq” fol'klor balalar ansamble“ , Qazannıñ Avia tözeleş rayonınıñ 10 gimnaziäsendä urnaşqan “Bällür” balalar biyu ansamble; cırçılar Ferdinant Säläxov, Aygöl Xäyri , İnzirä häm Sänifä Rangulovalar, Güzäl Urazova, Miñğol Galiev häm şulay uq İlnur Cihangirov, Närkäs Xarrasova çığış yasadılar.
Satira häm yumor ostası Almaz Xamzin çığışı häm Räşit Yağfarovnıñ yaqtaşı Mäsğüt İmaşevnıñ başqaruında alar bergä icat itkän “Barda tübätäye” cırı bu yubiley kiçäsen tağın da bizäp cibärde.
Menä şulay itep, siräk bulsa da, tatar milli xäräkäteneñ ädibenä, üze isän çaqta uq zurlawnı kürergä nasip buldı.
Mälikä Basıyr , Qazan.
