Tatarstan balalar sirk mäktäbendäge uquçılarnıñ ğömerlärenä här kön diärlek qurqınıç yanıy. Çönki sirkta kötelmägän xällär yış bula. Anda uquçılar 5 yäştän alına häm 16 yäşkäçä monda şöğellänälär. Matbuğat oçraşuında qatnaşqan balalar sirkı mäktäbe sänğät citäkçese İldar İgumnov xäzerge waqıtta barlığı 100дән artıq uquçı buluın äytte. Sirk mäktäbenä uquçılar küpläp kilgän kebek, küpläp kitärgä dä mäcbür. Çönki monda barı iñ çıdamlılar ğına saylanıp alına. Tatarstan sirk mäktäbe oyışqanğa ide 10 yıl buldı. Berençelärdän bulıp kilgän uquçılar Kanada, İtaliä, İzrail', Angliä, Fransiä kebek illärdä bulıp törle bäygelärdä ciñep qaytqannar. Matbuğat oçraşuında törledän-törle maqtaw käğäzläre, täbrikläwlär, medal'lär kürsätelde. Läkin uquçılarnıñ härqaysı Rusiä sirkı qanatı astında çığış yasarğa mäcbür, Rusiä danın kütärä. Ciñüçelär dä Rusiädän dip äytelä. Balalar sirkı mäktäbe sänğät citäkçese İldar İgumnov respublikada üzebezneñ milli yäşlär sirkın buldırırğa xıyallana. İldar İgumnov
Tatarstanda monnan 30 yıl elek sirk bulğan. Bezgä xäzer üzebezneñ sirknı buldırırğa kiräk.
Balalar sirkına yörüçelärneñ küpçelege kiläçäkläre yä Mäskäw, yä çit il sirkları belän bäylärgä mäcbür. Rusiä däwlät sirkına urnaşıp, annan çit ilgä alınuçılar da bar. Häm şartnamä nigezendä, çit ildän alar öçen Rusiä sirkına aqçalar kilep tora. Häm şaqtıy zur aqçalar. İldar İgumnov şul aqçalar Tatarstanğa da kilä alır ide di. Şulay uq ul ber tapqır Parijğa bäygegä barırğa turı kilüen söyläde. Rusiä däwlät sirkı iseme astında barırğa telämiçä, rizalıq alıp ul alıp barğan qız Tatarstan iseme astında çığış yasağan. “Maxsus Tatarstan bayrağı belän barıp çığış yasadıq”, di ul. Näticä çığarğanda isä Tatarstan digän däwlät yuq bit dip beldergännär. İldar İgumnov äytüençä, älege uquçılarnı tärbiäläwgä Tatarstan aqçası kitüen, ä Mäskäwlär äzer uquçılarnı ğına alıp kitülärenä borçılu belderep söyläde. İldar İgumnov
Bezneñ uquçılar häryaktan äzerlekle. Alar böten künekmälärne başqaralar. Şuña alarnı Mäskäwlär alıp kitä.
İlküläm tanılğan sirkı uquçılarına Tatarstan tarafınnan iğtibar citep betmäwenä üpkäläw dä belderelde. Matbuğat oçraşuında qatnaşqan Vyaçeslav Çabanenkonı küptän tügel Gollivudqa fil'mda töşärgä çaqırğannar. Ä Al'fred Kamalov bötenläy dönyada da berkem eşli almağan künegülärne, biş tägärmäç östenä basıp jonglerlıq qıla ikän. Läkin şul uq waqıtta alar xätta çığışları öçen külmäklärne dä üzläre tegärgä mäcbür.
Tatarstan balalar sirkınıñ abruylığı turında bu könnärdä uzuçı çaralar da söyli. Alar 31 may häm 1 iyün könne Qazan sirkında ütä. İke könlek bäyräm tamaşasına, yäğni sirktağı 2 meñnän artıq urınğa biletlar 1 köndä satılıp betkän.
Landış Xarrasova
