İzge Bolğar cıyını täkbir äytü belän başlandı. Yäğni meñlägän xalıq Tälğät Tacetdin artınnan Keçe manarağa taba yul aldı - Täwbä qılır öçen.. Keçe manara yanında da inde şaqtıy möselmannar cıyılıp Tälğät Tacetdinnı kötep toralar ide. Täwbä qılınu belän bergä Tälğät Tacetdin wäğäz dä uqıdı.
Şul uq waqıtta ikençe cirdä säxnä buldırılğan ide. Anda da wäğäz uqular başlandı.
Cıyınnıñ räsmi açılu tantanası başlanğançı Rusiä töbäklärennän kilgän millättäşlärebez çatırların qorıp, pılaw, aş peşerü, östäl äzerläw belän mäşgul' ide. Qayberläre qorban çalır öçen kiçtän ük kilep qunğannar. Küpläre qorbannarnı üzlärendä çalıp kilep, mondağı xalıqnı da sıyladılar. Çuaşiädän kilgän millättäşlärebez 25 qorban çalıp kilgännär.
Bez bu urınğa unikençe tapqır kiläbez. Monı kübese tamaşa kebek qarıy. Bu bit qorban çala, doğa qıla torğan urın.
Cıyında şulay uq säwdä noqtaları eşläde. Anda qazılıq, möselman kalendar'läre, kiemnär, bötilär, kitaplar satıldı.
İzge Bolğar cıyınınıñ räsmi açılu tantanasında möftilär Tälğät Tacetdin, Ğosman İsxaqi, Näfiğulla Aşirov belän berrättän Bötendönya tatar kongressı başqarma komitetı räise Rinat Zakirov, deputatlar Tufan Miñnullin, Razil Wäliev häm yazuçılar bar ide. Çığış yasawçı din ähelläreneñ küpçelege kiläçäktä monda Tatarstan Xökümäte mäçet buldırsın ide digän teläk belän çıqtı.
Berniçä yıl elek älege cıyınğa qarşı bulğan Tatarstan möselmannarı Diniä Näzaräte räise Ğosman İsxaqi
Bu cıyın möftilär tarafınnan ğına oyıştırılsa min xäzer dä qarşı bulır idem. Bu möftilär öçen genä tügel, ä böten xalıq öçen bulırğa tieş. Bıyıl anı kongress ta oyıştıra. Däwlät işette. Şuña min kildem.
Räsmi çığışlardan soñ bergäläp öylä namazı uqıldı. Töştän soñ cıyın cır-iyüllär belän däwam itte. Çığışlar arasında salyut ta buldı. Konsert säğät dürtlärgä tögällände.
Landış Xarrasova
