Qazanda “Milli aşlar könnäre” bara

Qazanda 14 avgusttan “ Xalıqlarnıñ milli aşları könnäre”digän aksiä başlandı. Bu respublika könen uzdıruğa äzerlänüneñ ber çarası bulıp tora. Bu çarada şähärneñ törle cämäğät tuqlanu oyışmaları yäğni, şähärneñ 30 kafe , restoranı qatnaşa. Anda törle xalıqlarnıñ milli aşların täqdim itü çaraları ütkärelä. “Xalıqlarnıñ milli aşları könnäre” aksiäse qısalarında tatar häm rus xalıqlarınıñ milli aşları belän bergä , Auropa xalıqlarınıñ da , şärıq xalıqlarınıñ da milli aşları täqdim itelä.

Bez bu çaranı ütkärgän Qazan şähäreneñ Qullanuçılar komitetına şıltıratıp soraştıq . Anda bezgä bu komitetnıñ baş belgeçe Flürä Gorşkova menä närsälär dide. “

“Şähärebezdä törle millät xalıqları yäşi. Respublikanıñ tuğan köne yaqınlaşıp kilä. Qunaqlarğa häm şähärdä yäşäwçe törle millät xalıqlarına, üzläreneñ milli rizıqların aşap qarar öçen mondıy çaralar ütkärü traditsiägä kergän.

Menä bügen tatar milli aşların täqdim itü “Vodoley”kafesendä ütä. Kön sayın qayda da bulsa ütkärelä. Alar bik küp, barısı turında da söyläp beterep bulmıy. Alar şähärdä 30 .

24 avgustta Tetsevskaya uramındağı 181 yortta “U babaya” kafesendä tatar milli rizıqları täqdim iteläçäk.

Kiçä “Yujnıy” gipermarketta “ Aş-su”digän kulinariä kafesendä tatar milli rizıqların täqdim itü buldı. Tatarça söyläşkän keşelär dä qunaqlar da bik küp ide. Çäk-çäklärne , öçpoçmaqlarnı niçek peşeräsez?- digän sorawlar belän möräcäğät itüçelär dä buldı. Bik matur , häm küñelle ütä bu çara, - dide Flürä Gorşkova.

Bıyıl bu çarada qatnaşqan qıtay- yapon milli aşları belän dan totqan “Kanpay” restoranı citäkçese İskändär äfände Azatlıq radiosına menä närsälär dide: “ Bez bıyıl Singapur häm Malayziä xalıqlarınıñ milli aşların täqdim itep qararğa buldıq”, - dide ul.

Ä anda şärıq rizıqların osta häm tämle itep äzerläwçe tatar qızı Rimma Сiһangirova Singapur kuxnyasınıñ serlärenä töşenderde:

“Satay iz kuritsı” dip atalğanı “ Çikläwektän yasalğan sous belän qoyındırılğan , tozlı- borıçlı tämlätkeçlär quşılıp qızdırılğan tawıq şaşlığı, “Pop'ya” dip atalğanı - bambuk, krevetki häm duñğız itläre törelgän taba ikmäge”

Bu aksiä 25 avgustqa qädär äle däwam itäçäk.

Qazanda törle millätlärneñ milli aşların täqdim itkän cämäğät tuqlanu urınnarı şaqtıy.Ämma tatar milli aşları bulğan cämäğät tuqlanu urınnarın sanap kitsäk, “Çäy” yortınnan häm “Bilär” restoranınnan başqaları berdä xätergä kilmi. Ä “Dom tatarskoy kulinarii” digän restoranda tämle rizıqlarnı bik qalın kesäle äfändelär genä awız itä ala.

Mälikä Basıyr