Rusiä belän İslam dönyası arasında mönäsäbätlärne kileşterü törkemeneñ 2нче utırışınnan soñ uzğan matbuğat oçraşuında Rusiä Prezidentınıñ İdel buyı federal' okrugıyndagı wäkile Aleksandr Konovalov, akademik Yevgeniy Primakov häm başqa şäxeslär qatnaşsa da, “İnterfax” xäbärçeseneñ 1 sentäberdän Rusiä töbäkläreneñ qayberlärendä pravoslaw mädäniäte uqıtıla başlawğa mönäsäbät buyınça cawapnı Mintimer Şäymiev
Rossiädä beryaqlı ğına Pravoslawiene öyrätü fänen kertü, minemçä, bik zur yalğışlıq. Min elek tä äytkän idem: Tatarstanda bu bulmayaçaq dip. Uquçılar dinnärneñ nigezen belsennär öçen dönyawi fänne äzerlärgä mömkin. Mondıy däreslek äle yuq. Ul Rossiä mäğärif häm fän ministrlığı tarafınnan täqdim itelä ala. Ägär ber genä dinne öyrätü turında süz bara ikän, anıñ öçen yäkşämbe mäktäpläre bar. Xäzer barlıq mömkinleklär qaralğan. Başqa yunäleş älegä yuq. Min inde üz süzemne äyttem. Uylıym, mondıy yalğışlıqnı eşlämäslär dip.
Mintimer Şäymiev däreslek kiräk disä, avgustta Täteştä uzğan respublika uqıtuçılarınıñ yıllıq kiñäşmäsendä TR mäğärif häm fän ministrlığınıñ milli mäğärifne üsterü bülege belgeçe Alsu Yusipova respublikanıñ ministrlığı häm Mäskäw näşriyatları zaman taläplärenä turı kilerlek “Dinnär tarixı" digän yaña däresleklär äzerläw östendä eşli dip beldergän ide. Şulay uq ul uqıtuçılar öçen maxsus yärdämlek tä äzerlänüen äytte respublikanıñ Mäğärifne üsterü institutı tarafınnan. Älege eşneñ barışı belän qızıqsınğaç, respublikanıñ Mäğärif häm fän ministrlıysınnan Alsu Yusipova bu xaqta “Azatlıq” radiosına añlatma birüdän baş tarttı. Citäkçelek röxsätennän başqa, mäğlümat birü toyıla dip cawapladı.
Bötendönya tatar kongressı Başqarma komitetı da Rusiä töbäklärennän borçılıp şaltıratuçılar barlığın äytä. Kongress räiseneñ berençe urınbasarı Renat Wäliullin “Azatlıq” radiosına bolay dide
Kongress fikerlären tatar tele uqıtuçılarnıñ Qorıltayında kütärep çıqtıq. Bik az tatarlar ğına Tatarstanda yäşi. Qalğannarı Tatarstannan çittä yäşi. Rusiädä mondıy eşne başlap cibärü tatarlarnıñ häm möselmannarnıñ xoquqların bozu dip äytep bula. Bez monı RF mäğärif häm fän ministrlığına cibärgän rezolyutsiädä dä bilgeläp uzdıq häm maxsus xat cibärdek. Şulay uq respublikanıñ İctimaği palatasında da üzebezneñ komissiä utırışında kütärep çıqtı. Ul yaqlaw tabırmın äle bilgesez.
İslam. ru saytı bu könnärdä, Rusiäneñ möftilär Şurası mäktäplärdä “İslam mädäniäte nigezlären” kertüne dä taläp itäçäk dip yazıp çıqtı.
Landış Xarrasova
