Festival'neñ ikençe könendä, qunaqlar Qazan belän tanışıp yördelär.
“Altın mönbär” kinofestivaleneñ programmasına kilgändä, yäğni 11 sentäberdä näfis fil'mnardan, anda Qazaqstannan alıp kilengän “Dala ekspressı”, İrannan - “Ülemgä alıp barğan marafon” häm Hindstanda töşerelgän “Sayra ” dip atalğan fil'mnar kürsätelde.
Dokumental' fil'mnardan: Äfğanstannan: “Cir çige ”, “Pamir tirä yağı”, İordaniädän: “Säläxetdin mönbäre”, Säwd Ğaräpstanınnan: “Körändäge tögällek”, häm Qazaqstannan: “Yevraziä kontinentı. Yevraziä arıslanı”. digän fil'mnar täqdim itelde.
Ä kiçen festival' qısalarında Qazaqstan fil'mnarı köne uzdı. Anda Oljas Söläymanov turında dokumental' fil'm häm “Küçmä xalıq”dip atalğan näfis fil'm kürsätelde.
Uzğan yılda Qazanda “Altın mönbär” festivalendä berençe urınğa Azerbaycannan kilgän “Sixerçe” fil'mı layıq bulğan ide.
Anıñ avtorı rejisser, dramaturg häm prodyuser Oqtay Mir- Qasıym. Bıyıl ul jyuri äğzası. Bıyıl da bu festival'neñ Tatarstanda, häm Qazanda uzuınıñ ähämiäte nidän ğibärät digän sorawğa Oqtay- Mirqasıym bolay dide: “Qazan ul törki xalıqlarnıñ mädäniäte üseşendä ayırım ber zur urın alıp tora. İslam dineneñ häm anıñ mädäniäteneñ iñ Tön'yaq yağında üseş alğan urını bulıp sanala. Festival' turında äytkändä, anıñ Qazanda ütüenä, alar moña layıq, alar moña ışanıç qazandı . Tatarstanlılarğa kino sänğäteneñ Tatarstanda üseş aluı öçen, bu bik uñay xäl. Ä festival'neñ şiğar'lärenä kilsäk, Tatarstan ul Rusiäneñ ber öleşe. Ä Rusiädä bik küp törle dinnär şulqädär barısı ber- berse belän tığız bäyläneştä. Şunıñ öçen İslam faktorın buldıru, aña öndäw Rusiäneñ burıçı, Rusiä İslamğa keşene öndärgä tieş,- dide Oqtay Mir-Qasıym.
Ä xäzer tamaşaçı fikere belän tanışıp kitik.
“Min “Dala ekspressı” digän kinonı qarap çıqtım yaña ğına. “Canıma ber yal aldım”- dide “Söyembikä jurnalı xezmätkäre, xäbärçese Filisä Xakimova .
Xäzer Başqortstannan Sälimä xanımnı tıñlap alıyq. Ul . “ Säläxetdin mönbäre” dip atalğan kinofil'm turında bolay dide:
“ Keşeneñ üz dinenä, ilenä qağılırğa yaramıy. Rejisser şul fikerne töp fiker itep açınıp äytä. Üze ışanğan, inanğan dinennän keşene cimerep , qayırıp taşlaw, ul berwaqıtta da yaxşığa alıp kilmi”dide ul. Ä bıyılğı kinofestival'neñ Qazanda ütüe turında ul bolay dide :
“Qazanlılarnı min buldıralar, diär idem. Zur möselman dönyasında kilep tuarğa tieş bulğan “Minbar” festivalen alar eläkterep aldılar, kütärdelär häm alıp ta barsınnar. Bik yaxşı oyıştırılğan. Räxmätemne äyter idem oyıştıruçılarğa”,- dide Sälimä xanım.
“Altın mönbär” kinofestivale äle 15 sentäbergä qädär däwam itäçäk.Här telägän keşe festival' qısalarında kürsätkän fil'mnarnı qarıy ala.
Mälikä Basıyr
