Uqularğa berençe çiratta keşe xoquqların bozıp, cinayätkä tartılğan militsiä wäkilläreneñ citäkçeläre çaqırılğan. Xezmätkärläre tarafınnan eşlängän yalğışlıq öçen Eçke eşlär idäräseneñ cinayätçelärne ezläw bülekçäläre başlıqları cawap totarğa tieş bula. Çönki uqu barışında elek bulğan häm şaqtıy yañğıraş tapqan keşe xoquqların bozu oçraqları da tikşereläçäk. Alar buyınça fiker alışınaçaq.
Qazan buyınça ğına bulğanğamı treninglarğa barlığı 21 keşe genä qatnaşa. Ämma kiläçäktä bu yunäleşne cäyelderü - täcribäne respublika buyınça taratu farazları küzdä totıla ikän. Çönki militsiälär tarafınnan xalıqnı cäberläwlär äledän-äle işetelep tora.
Qazanğa qädär mondıy psixologiä häm xoquq uquları Mari İle respublikasındağı Yoşkar-Ola şähärendä oyıştırılğan. Treningnıñ qağidälären dä “Agora” isemle töbäkara keşe xoquqların yaqlaw oyışması berlege belgeçläre häm Yoşkar-Olanıñ “Keşe häm Xoquq” oyışması tarafınnan eşlängän. Tatarstan başqalasında isä uqularnı Qazan şähäreneñ keşe xoquqların yaqlaw üzäge oyıştırğan. Älege üzäkneñ matbuğat xezmäte citäkçese Liliä Safina
Ğämäldä keşe xoquqların bozunı beterü misalları kitereläçäk. Anı çınlıqta bulğan waqiğalarğa basım yasalaçaq.
Liliä Safina belderüençä, Qazannıñ keşe xoquqların yaqlaw üzägenä dä militsiä tarafınnan räncetelgän keşelärneñ xoquqları yaqlarğa turı kilgän. Uqularda şul oçraqlarğa da tuqtalaçaqlar. Liliä Safina
Bu ike köndä Eçke eşlär idäräse citäkçelärenä tağın ber qat keşe xoquqları turındağı bilgelämälärne añlataçaqlar. Keşe xoquqların çikläw xaqında söyläyaçäklär. Xalıqara häm Rusiä qanunnarına tuqtalaçaqlar. Berdäm fiker alışu waqıtında uqıtuçılar häm Eçke eşlär idäräse xezmätkärläre keşe xoquqların bozuğa kiterä torğan oçraqlarnı açıqlarğa tırışaçaqlar.
Liliä Safina äytüençä, Qazannan soñ uqular Çuaşiä respublikasında häm Çita ölkäsendä däwam itäçäk. Şulay uq alar kiläçäktä Samara häm Ul'yanda da oyıştırılaçaq. Barlığı bu programmada 6 töbäk qatnaşa. Alarnıñ härqaysında xoquq yaqlaw oyışmaları eşli. Häm alar barısı da “Agora” digän keşe xoquqların yaqlaw oyışması berläşmäsenä kerälär.
Landış Xarrasova
